​Хәбиевлар Мәскәүдән җиңү белән кайта!

«Ел гаиләсе» бәйгесе быел Россиядә беренче тапкыр үткәрелде. Оештыручылар әйтүе буенча, аның төп махсаты – гаиләнең дәрәҗәсен күтәрү, гаилә кыйммәтләрен саклау.

Конкурста Россиянең 79 төбәгеннән 294 гаилә катнашты. Җиңүчеләрне 5 номинация буенча ачыкладылар: «Күп балалы гаилә», «Яшь гаилә», «Авылда яшәүче гаилә», «Россиянең алтын гаиләсе», «Гореф-гадәтләрне саклаучы гаилә». Кичә кич Мәскәүдә, «Россия» концертлар залында җиңүчеләрне тәбрикләү тантанасы булды. (Әле концерт-тамашаның телеверсиясен ОТР каналы 26-27 ноябрь көннәрендә күрсәтәчәк).

Бәйгенең җиңүчеләре арасында «Сөембикә» журналының ноябрь саны тышлыгын бизәгән Дилүзә ханым һәм аның ире Руслан Хәбиевлар да бар. Алар «Гореф-гадәтләрне саклаучы гаилә» номинациясендә җиңү яулады. Тиздән дүртенче тапкыр әни булырга җыенучы Дилүзәне без «Нечкәбил» бәйгесе җиңүчесе буларак та беләбез. Идел буе округының Пермь шәһәрендә узган «Уңышлы гаилә» конкурсыннан да Хәбиевлар җиңү белән кайткан иде. «Бәйгедә катнашасыңмы – җиңәргә кирәк!» – диләр алар. Бу юлы да беренчеләр исемлегенә эләгү өчен аларга берничә буынны бәйләп торган бердәмлек, туганнар арасындагы мөнәсәбәт һәм гаиләләрендә милли традицияләребезне саклау ярдәм итте.

Бәйге нәтиҗәләре буенча, җиңүчеләрнең гаилә тарихлары тупланган «Ел гаиләсе – 2016» дигән китап дөнья күрәчәк.

Дилүзә ХӘБИЕВА гаиләсе турында биредә укырга - http://syuyumbike.ru/zaman-hem-bez/arabyzdan-berebez/?id=3461