Казанда узачак юбилей «Тау Фест» фестивалендә Дарья Донцова һәм Нина Дашевская катнашачак

Биш ел элек «Бәхетле тарихлар» мәдәниятне үстерү хәйрия фонды тарафыннан оештырылган фестиваль камера проектыннан төбәкнең китап календаре буенча иң якты вакыйгаларның берсенә әверелде һәм 2025 елда китап фестивальләре ассоциациясе версиясе буенча Татарстанның иң яхшы китап фестивале дип танылды. Китап текст кына түгел, ул – буыннар һәм халыклар арасындагы бәйләүче җеп, мәдәни хәтерне саклаучы, дип билгеләп үтәләр проектны оештыручылар.

Фестивальнең төп мәйданчыклары Казансу елгасы яр буенда урнашкан «Елмай» балалар паркы, Кремль һәм «УРАМ» экстрим-паркы янында булачак. Парк киңлеге алты тематик урыннан торган китап галәменә әвереләчәк: «Сәхнә», «Глаголица», «Бәхетле тарихлар», «Роберт Миңнуллин исемендәге Республика балалар китапханәсе», «Китап ярминкәсе» һәм «Ачык мәйданчык».

Чара программасына 70тән артык интерактив вакыйга, шул исәптән китап ярминкәсе, язучылар белән очрашулар, мастер-класслар, шигъри һәм театраль куелышлар, дискуссияләр керә. Төп вакыйгаларның онлайн-трансляцияләрен «ВКонтакте» социаль челтәрендәге фестивальнең рәсми төркемендә карарга мөмкин булачак – шулай итеп «Тау Фест» паркта кунакларны гына түгел, ә бөтен ил буйлап тамашачыларны да берләштерергә ниятли.

30 дан артык әйдәп баручы нәшрият, алар арасында «Самокат», «МИФ», «Аквилегия», Татарстан китап нәшрияты, «ДМК Пресс», «ЛЕГИОН», «Мәктәп китабы», «Умаленд», «Букмарк», «Читай Умма», «ПерельМания», шулай ук Минскиның «Новое знание» һәм башкалар үзләренең яңалыкларын китап ярминкәсендә тәкъдим итәчәк.

Фестиваль программасы гамәлләр аша җәлеп итү принцибына нигезләнгән һәм дүрт төп юнәлешне күздә тота: «Яшь талантлар сәхнәсе», «Укучылар бәйгесе», «Әдәби лекторий «Диалог на равных», «Иҗади лабораторияләр».

«Яшь талантлар сәхнәсе»нең төп геройлары «Глаголы. Рифмы. Мысли» шигъри спектакле белән «Глаголица» Халыкара бәйсез әдәби премиясе җиңүчеләре һәм финалистлары булачак. Монда ТР халык артисты Эльмира Кәлимуллина катнашачак.

Моннан тыш, Сергей Анатольевич Махотин исемендәге призга «Лето нараспашку» шигырь укучылар бәйгесенең финалында балалар тавышлары яңгыраячак.

«Диалог на равных» форматында язучылар белән шактый күп очрашулар планлаштырылган:

• аерым алганда, Россия Язучылар берлегенең «Россия төбәкләрендә язучылар белән иҗади очрашулар» проекты кысаларында бестселлер булган дистәләгән детектив авторы Дарья Донцова һәм балалар фантасты «Таня Гроттер» китаплар сериясен булдыручы Дмитрий Ельц белән иҗади очрашулар һәм автограф-сессия узачак;
• Краснодардан популяр яшь автор Алекс Хиллдан «Танцуй со мной в темноте» дилогиясен тәкъдим итү булачак;
• укучылар белән язучы Андрей Усачев (Мәскәү) һәм шагыйрә Галина Дядина (Арзамас) очрашачак;
• язучы, журналист һәм сәяхәтче Евгений Рудашевский белән очрашу булачак (Мәскәү);
• язучы Нина Дашевская белән интерактив «Битва смыслов» оештырылачак (Санкт-Петербург);
• татар язучылары һәм шагыйрьләре Галимҗан Гыйльманов, Рифат Сәлахов, Рөстәм Галиуллин, «Габдулла Тукай.140 ел» фильм авторлары Элина Мәрданова һәм Данис Хисмәтуллин, шулай ук «Тукай архивы» фильмы режиссеры Ренат Хәбибуллин катнашуында «XIX гасырда Г. Тукай феномены» дигән сөйләшү оештырылачак;
• Россия шагыйре, прозаигы, С. Я. Маршак һәм К. И. Чуковский исемендәге әдәби премияләр лауреаты Сергей Махотин белән очрашу узачак;
• зилантлар һәм язучы Олеся Феоктистова белән күңелле очрашу булачак;
• халык алдында шагыйрь, язучы, журналист, тәрҗемәче, галим Ленар Шәех чыгыш ясаячак;
• укучылар белән «Сүзләр һәм тылсымлы тарихлар магиясе» темасына Россия язучысы һәм сценаристы, шагыйрә һәм әкиятче Юлия Ивлиева катнашачак;
• табышмаклар иле буйлап мавыктыргыч сәяхәтне язучы Дания Нәгыйм оештырачак;
• «Глаголица» премиясе җиңүчеләре – яшь шагыйрьләр Елена Ануфриева (Северодвинск) һәм Кирилл Половинский (Краснодар) китапларын тәкъдим итү оештырылачак;
• фестиваль кунаклары игътибарына «Абага чәчәге» нәшриятыннән «Татар гаиләләре» дигән комикслар тәкъдим ителәчәк;
• бөек татар язучысы Габдулла Тукайның тууына 140 ел тулуга багышланган интерактив-квест һәм иҗат элементлары булган тематик чара булачак.

«Иҗади лабораторияләр» интерактив зонасы балалар һәм яшүсмерләр өчен аеруча кызыклы булачак. Ул үз эченә алачак:

• язучы Нина Дашевскаядан «Стулофон» музыкаль перформансы;
• Россия комикслар индустриясе эшлеклесе Денис Лопатниковның (Мәскәү) визуаль хикәяләү, сторителлинг һәм комикс персонажларын булдыру буенча мастер-класслары;
• Евгений Кощевскийның (Санкт-Петербург) «Куколҗная феерия» марионеткалар спектакле белән чыгышы;
• ТР Иҗат яшьләре академиясенең «ПрофилАрт» Республика театраль куелышлар конкурсында җиңүче «Пластинка» театр коллективыннан буллинг темасына куелыш;
• рәссам Софья Соколова катнашында Богдан Лимаренко (Санкт-Петербург) комиксын тәкъдим итү (Мәскәү);
• балалар шагыйрәсе Йолдыз Шәрәповадан «Табигатьне ясыйбыз» мастер-классы;
• рәссам-график, иллюстратор Максим Покалевтан иҗади мастер-класс;
• шагыйрә, Татарстан Республикасының Габдулла Тукай исемендәге Дәүләт премиясе лауреаты Лилия Гыйбадуллинадан мастер-класс;
• «КидСпейс»ның (KidSpace) «Энциклопедик» программасы кысаларында кечкенә кунаклар үзләрен археологлар, космонавтлар, архитекторлар һәм табиблар итеп сынап карый алачак.

Моннан тыш:

• асфальтта рәсемнәр марафоны (фантазияне уяту һәм балага әсәрне бергәләп иҗат итү турында якты истәлекләр бүләк итү өчен менә дигән мөмкинлек);
• Чиләбедән математика укытучысы һәм Фәнне популярлаштыручы Петр Земсков чыгышы (мавыктыргыч фокуслар, күңелле башваткычлар һәм катлаулы сорауларга гади җаваплар аша бөтен гаилә белән математикага гашыйк булу өчен менә дигән мөмкинлек);
• Томскидан ике тапкыр дөнья тирәли сәяхәт итүче Евгений Ковалевскийдан Антарктида турында хикәя (чыгыш планетаның иң серле материгы серләрен ачарга һәм «Сәяхәтче күзләре белән дөнья» проекты турында белергә мөмкинлек бирәчәк);
• Гештальт-терапевт Фәридә Абдуллинаның «Гаилә өй сыман» психологик  остаханәсе җылы, ышанычлы мөнәсәбәтләрне ничек төзүгә багышланачак.

Фестивальнең Музыкаль программасы легендар композитор, «Пластилин Карга» мультфильмының музыка авторы Григорий Гладков чыгышы, «Хыял» вокаль триосы, Татарстан Халыклары дуслыгы йортының бию коллективлары чыгышы һәм атаклы Казан камера оркестрының «La Primavera» хәйрия концерты  – дирижеры М. Җәлил исемендәге Республика премиясе лауреаты, Татарстан Композиторлар берлеге рәисе Ильяс Камал чыгыәларыннан торачак.

«Тау фест» фестивалендә филантропия мәсьәләләренә – «Счастоивые истрии» ХФ эшчәнлегенең төп юнәлешләренең берсенә аерым игътибар бирәчәкләр. Үзенең тәрбияләнүчеләре белән бергә фондның күптәнге дусты – Оренбург өлкәсенең Орск шәһәреннәнрослга Тимошенко,  өлкәннәр өчен «Маяк» картлар йортына нигез салучы киләчәк. Ә «Э-моция» Иҗади инклюзив студиясе һәм «ТРИСТОРИ» Казан плейбэк-театры актерлары тандемы аларның тарихларын сәхнәдә үк җанландырачак, шәхси тәҗрибәләрен импровизация сәнгатенә әверелдерәчәк.

Фестивальнең барлык көннәре мәйданчыкта масштаблы хәйрия марафоны узачак, аннан җыелган барлык акчалар «Глаголица» халыкара бәйсез әдәби премиясе җиңүчеләре – 10 яшьтән 17 яшькә кадәрге яшь әдәбиятчыларның текстларын үз эченә алган альманахны бастыруга юнәлдереләчәк. Альманахлар мәктәп, шәһәр һәм бистә китапханәләренә тапшырылачак.

«Тау фест» әдәби геройларның костюмлы парады һәм музыкаль «Гитарник» белән тәмамланачак, анда барлык килүчеләр бергә һәм хор белән рус һәм татар телләрендә яраткан җырларын җырлаячак.

 Фотолар: «Тау фест» фестиваленең алдагы елларның берсеннән. 

Фотолар чараны оештыручылар тарафыннан бирелде.