29 августта Казанда шәһәркүләм Мәүлид бәйрәме узачак. Мәхәммәд Пыйгамбәрнең салләллаһу галәйһи вә сәллам тууына 1500 ел тулу уңаеннан оештырылган бу чара 15.00 сәгатьтә Иске Татар бистәсендә урнашкан дин галиме Ш. Мәрҗани һәйкәле янында башланып китәчәк дип фаразлана.
Мәүлидне оештыручылар төрле яшьтәге кунаклар өчен бай дини-мәгърифәтчелек программасы әзерләде. Бәйрәмдә хаҗга – ике, гомрәгә бер юллама уйнатачаклар. Мәүлидкә килгән һәр мөселман билет алып бәхетен сынап карый ала. Бүләк уйнатуда җиңүчеләр 2026 елда «Комфорт» программасы буенча – хаҗга, «Стандарт» программасы буенча гомрәгә (кече хаҗ) юллама алу өчен сертификатлар алачак. Фестивальнең махсус кунаклары – Россиядә иң танылган нәшид башкаручы «Нәшидүл ислам» төркеме җырчылары. Нәшидләр гарәп һәм рус телләрендә яңгыраячак. Шулай ук бәйрәм сәхнәсендә Мәүлид турында театральләштерелгән тамаша күрсәтеләчәк, хәзрәтләр вәгазьләр сөйләячәк, ә танылган татар артистлары һәм коллективлары дини кануннар кысаларында үзләренең иҗади номерлары белән чыгыш ясаячак. Балалар өчен викториналар да узачак. Бәйрәмгә рәхим итегез!
Фото: Мәликә Асатуллина
Следите за самым важным и интересным в Telegram-каналеТатмедиа
Фәгыйлә ШАКИРОВА,
Комментарий юк