Казан халыкара XI мөселман киносы фестивале фильмнарына Татарстан режиссеры да бәя бирәчәк

Оештыручылар хәбәр иткәнчә, фестивальнең жюри составы тулысынча формалашып беткән һәм алар арасында Россия, Латвия, Казакъстан һәм Үзбәкстан вәкилләре бар.

Фестивальнең жюри составына режиссер, актер, сценарийлар авторы һәм продюсер, Россиянең халык артисты Владимир Меньшов җитәкчелек итәчәк. Ул «Любовь и голуби», «Зависть богов» фильмнары режиссеры, «Курьер», «Генерал», «Царевич Алексей», «Дневной дозор», «Легенда №17» кинокартиналарында уйнаган артист буларак сәнгать сөючеләргә билгеле шәхес.

Шигъри кино лирикасы остасы дип аталган Үзбәкстан ССР халык артисты Эльер Ишмөхәммәтов тамашачыларга «Нежность» фильмы аша таныла. Ә ул уйнаган «Влюбленные» кинокартинасы исә Совет кинемотографиясе классикасына әверелә. Аның «Гвоздь» (2014 ел) фильмын кинофестиваль кысаларында да тамаша кылырга мөмкин булачак.

Кинорежиссер, сценарийлар авторы, продюсер, рәссам, архитектор, Евразия кинофестивале директоры Рәшит Ногъманов Казакъстанны тәкъдим итәр дип көтелә. Аңа танылуны Виктор Цой белән төп рольдә төшергән «Игла» (1988) фильмы китерә. 2010 елда Рәшит Ногъманов фильмның дәвамын төшергән.

Жюри составында тамашачыларга «Смерть под парусом», «Тайная прогулка», «Красные колокола» фильмнары аша таныш Латвиянең кино һәм театр актрисасы Мирдза Мартинсоне да бар. Аның белән бергә, дөньяның 25 иленнән 51 фильмга Татарстан режиссеры, Россия кинематографистлары берлеге әгъзасы Илдар Ягафаров та бәя бирәчәк. Режиссерның беренче эшләреннән булган «Күктау» (2004) фильмы «Кинотавр» һәм Германия, Чехиядә уздырылган Европа фестивальләрендә бүләкләнгән иде. Кинокартина татар телендәге тулы метражлы беренче нәфис фильм санала.

сылтама: http://tat.tatar-inform.ru/news/2015/09/02/113065/