«Ел хатын-кызы. Ел ир-аты: хатын-кыз карашы» бәйгесе: беренче финалистлар билгеле

Зона турының иң беренчесе Лениногорск шәһәрендә узды. Анда Азнакай, Әлмәт, Баулы, Ютазы, Сарман, Бөгелмә, Мөслим, Лениногорск районнары вәкилләре  – барлыгы 52 хатын-кыз катнашты.

Бәйгене Лениногорск районы һәм Лениногорск шәһәре башлыгы Гыйрфанов Марат Нил улы ачып җибәрде һәм: «Бу – сезнең өчен бәйге түгел, ә бәйрәм булсын!» – дип, катнашучыларның һәрберсенә уңышлар теләде. 

Бәйгенең онытылмас мизгелләре байтак булды: аларның кайсысы сокландырды, елмайтты, ә кайсысыдыр күздән яшь чыгарды. 
...Житкова Людмила Васильевнаның («Өлкән буын героинясы» номинациясе, Лениногорск) сәхнәдә күбәләк кебек очып-очып биюе, аннан  шпагатка утыруы. Аңа 76 яшь!
...Алина Гатинаның («Хатын-кыз –  әни» номинациясе, Азнакай) ирен махсус хәрби операциягә озатып, 8 бала белән берүзе калуы.
...Римма Тюринаның («Һөнәрем – язмышым»  номинациясе. Әлмәт) токарь һөнәрен сайлавы һәм гомере буе аңа тугры булуы. 
...Гөлсия Талипованың  («Хатын-кыз – ел үрнәге» номинациясе, Азнакай) ирен махсус хәрби операциядә югалткач та, күз яшьләре аша елмая алуы. 
...Гүзәлия Газизуллинаның («Хатын-кыз – мәдәният һәм рухият» номинациясе, Баулы) күренекле язучы Фәнис Яруллин музеенда аның белән бәйле һәр экспонатны кадерләп саклавы.
...Энҗе Габдрахманова («Хатын-кыз – бизнес-леди» номинациясе, Азнакай)  үз эшен башлагач, бөтен гаиләсенең  – иренең, әти-әнисенең аңа ничек ярдәм итүе.
Мондый мисалларны бик күп дәвам итәргә була. 

Иң авыры – жюрига булды: иң-иң арасыннан лаеклыларны табарга кирәк иде. 
Берничә номинациядә барлык катнашучылар да җиңүче дип табылды. Менә алар:
«Өлкән буын героинясы» номинациясендә: 
Татьяна Галактионова (Азнакай);
Разия Галиева (Әлмәт);
Ләйлә Гафиятуллина (Баулы);
Вәлия Җиһангирова (Бөгелмә);
Вера Буболазова (Зәй);
Людмила Житкова (Лениногорск);
Миннегөл Мостафина (Ютазы)

«Хатын-кыз –  әни» номинациясендә: 
Алинә Гатина (Азнакай);
Рәмзия Габсәләмова (Әлмәт);
Регина Гайнетдинова (Баулы);
Арина Морева (Бөгелмә);
Екатерина Андреева (Зәй);
Ләйлә Ситдыйкова (Лениногорск);
Гөлнара Сабирҗанова (Сарман). 

«Олы йөрәкле ир-ат» номинациясендә:
Рафаэль Габделхаков (Азнакай);
Альберт Вильданов (Әлмәт);
Марат Ильясов (Баулы);
Булат Хәйруллин (Лениногорск).

«Ир-ат – лидер» номинациясендә:
Айрат Батыров (Азнакай);
Рөстәм Зарипов (Әлмәт);
Җәлил Хөснетдинов (Ютазы).