​Депутатлар #Подпишиблизких, #Подпиширодителей акциясенә кушылды

Бүген, 31 майда депутатлар Татарстан Дәүләт Советының унсигезенче утырышына җыелды. Көн кадагына куелган утыздан артык мәсьәләне тикшерер алдыннан закон чыгаручылар «ТАТМЕДИА» акционерлык җәмгыятенең #Подпишиблизких, #Подпиширодителей дип аталган матбугатка язылу акциясендә катнашты.

 
Билгеле булганча, 2016 елның икенче яртыеллыгына газета-журналларга яздыру буенча #Подпишиблизких, #Подпиширодителей акциясе 22 майда игълан ителгән иде, һәм ул 18 июньгә кадәр дәвам итәчәк. Аның дәвамында «ТАТМЕДИА» ширкәте составындагы йөздән артык басма матбугатка үзеңне генә түгел, ә туганнарыңны, якыннарыңны да яздырырга тәкъдим ителә. Утырышта катнашкан депутатлар исә республикадагы балалар йотлары, картлар йортларын да «Сөембикә», «Татарстан», «Идел», «Ялкын», «Казан утлары», «Казан», «Сабантуй» журналлары, «Мәдәни җомга», «Шәһри Казан», «Казанские ведомости» газеталары кебек матбугат чараларына яздырды. Мәсәлән, Баулы районының Крым-Сарай авылында урнашкан картлар һәм инвалидлар йортында яшәүчеләр алдагы ярты елда парламент рәисе Фәрит Мөхәммәтшин яздырган матбугат чараларын укыячак.
 
– Без мондый рәвешле язылу кампаниясен беренче тапкыр үткәрәбез. Ул үзенә күрә хәйриячелек акциясе дә булып тора. Татарстанда нәшер ителүче газета-журналларга яздырып, һәркем якыннарын, туганнарын, мохтаҗларны сөендерә ала. Акциягә инде бик күп кеше кушылды, – дип белдерде «ТАТМЕДИА» акционерлык җәмгыяте генераль директоры Андрей Кузьмин.

http://intertat.ru/