Чаллыда соңгы 20 елга беренче тапкыр мәктәп ачылды

Тантаналы чарада Татарстан Президенты Рөстәм Миңнеханов һәм мэр Наил Мәһдиев катнашты

Бүген, Белем көнендә, Чаллы шәһәрендә 20 елга беренче тапкыр яңа мәктәп ачылды. 30 нчы номерлы мәктәп 1200 укучыга исәпләп төзелгән. Тантаналы чарада Татарстан Президенты Рөстәм Миңнеханов, Автошәһәр мэры Наил Мәһдиев һәм башка рәсми затлар катнашты.

Республика башлыгы олыларны һәм балаларны котлап, бу вакыйганың мөһимлеген билгеләп үтте. “Шәһәр елдан-ел үзгәрә, яңара. Бүген без Мәләкәс елгасы буенда булдык, йөзү буенча дөнья чемпионаты мирасы булган бассейнны ачабыз. Бу микрорайонда мәктәп төзү турында үтенеч булган иде. Федераль бюджет, республика һәм шәһәр бюджетлары ярдәме белән бу проект тормышка ашырылды. Мин сезнең барыгызны да Белем көне белән котлыйм. Чаллының белем бирү сыйфаты буенча республикада әйдәп баручылардан булуын беләбез. Бу традицияне сакларга кирәк”, - дип теләде Президент.

Яңа мәктәп Чаллының 35, 36, 37 нче комплекслары турысында урнашкан. Өч катлы мәктәпнең актлар залы, 270 урынга исәпләнгән ашханәсе, спорт-сәламәтләндерү комплексында 600 кв.м һәм 240 кв.м мәйданлы 2 спорт залы, тренажер һәм хореография заллары, бассейн бар.

Мәктәпне “Евростиль” ҖЧҖ компаниясе төзегән. Моның өчен республика бюджетыннан 500 млн сум акча бүлеп бирелгән. Төзелеш эшләре 2015 елда башланган булган.

Әлеге мәктәпкә директор итеп Алена Кәримова билгеләнгән. Моңа кадәр ул 2010 елдан бирле Чаллының 43 нче номерлы мәктәбе белән җитәкчелек иткән.
сылтама: http://tatar-inform.tatar/