​Бер табын артында – 10 мең кунак!

Республика ифтарына килгән һәркемгә 500 сумлык ризык әзерләнде – бу хакта бүген «Татар-информ» мәгълүмат агентлыгы уздырган матбугат конференциясендә хәбәр иттеләр.

Исегезгә төшерәбез, «зур ифтар» – республика ифтары быел 15 июнь көнне «Теннис» академиясендә (Оренбург тракты, 101 йорт) узачак. Анда 10 мең кеше катнашачак. Ифтарны үткәрү урыны үзгәртелү сәбәпле, алданрак басылган һәм инде таратылырга да өлгерелгән 5 мең чакыру гамәлдән чыгарылган дип санала. 10 мең яңа чакыру кәгазе инде ифтарга киләсе кунакларның кулларында. 
Ун мең – алай ук зур сан түгел, –  ди Татарстан Республикасы мөселманнары Диния нәзарәте рәисе, мөфти Камил хәзрәт Сәмигуллин. – Билетларның берсе дә сатылмады. Сатылырга да тиеш түгел – бу хәйрия чарасы. Билетлар башлыча имамнар аша таратылды. Республика ифтары безнең һәммәбезне берләштерүче чара булачак.
Алдагы еллардагыча, ифтарга Башкортстаннан, Чуашстаннан, Ульян өлкәсеннән, Мәскәүдән кунаклар киләчәк. Чакырулар республика җитәкчеләренә дә таратылган. Кунаклар арасында Татарстан Республикасы Президенты Рөстәм Миңнеханов та булыр дип көтелә. 
Намаз урамда укылачак, ә табыннар академиянең эчендә, ике залда көйләнәчәк. Ифтарда катнашырга теләүчеләрнең саны бик күп, аларның барысын да «Теннис» академиясе сыйдырып бетерә алмаячак. Шуны истә тотып, оештыручылар өстәмә рәвештә тагын 1 мең ланч-бокс әзерлиләр. Алар билетлар җитмәгән кешеләргә таратылачак. Шул ук вакытта, бу көнне дә Казанның утыздан артык мәчетендә авыз ачу мәҗлесләре узачак, димәк, мохтаҗларның берсе дә ифтардан читтә калмаячак. 

 Ифтарга җәмәгать транспортында килсәгез хәерлерәк булыр иде, диләр оештыручылар. «Теннис» академиясенең машина кую урыны бу кадәр халыкның машинасын сыйдырмаячак. Ифтардан соң халыкны өйләренә автобуслар таратачак дип вәгъдә итәләр. 
Ифтарга килгән кунакларга 400 волонтер хезмәт күрсәтәчәк.