Балтач Мәдәният йортында «Пар канатлар» кичәсе үтте.

Әлеге кичәне «Татарстан» радиосының баш мөхәррире Рәзин Нуруллин алып барды.

Бу көнне сәхнәгә күтәрелгән, 50-60 ел бергә гомер кичергән парларның һәрберсе турында озаклап сөйләп булыр иде: Хания һәм Нотфулла Гариповлар (Нөнәгәр), Гөлфия һәм Мансур Газыймовлар (Смәел), Рәйханә һәм Рәхимҗан Хәкимҗановлар (Куныр), Рәшидә һәм Әхмәт Мөхәммәтшиннар (Түнтәр)... Район башлыгы Рамил Нотфуллин хаклы: Балтачта гаиләләр үзләренең тырышлыгы, ныклыгы, өлкәннәргә карата хөрмәте белән аерылып тора. Моны инде вакытлар исбатлаган. Сәхнәне тутырып утырган юбилярларны котлаучылар күп булды: Татарстан Республикасының Премьер-министр урынбасары – авыл хуҗалыгы министры Марат Әхмәтов, Бөтендөнья татар конгрессы каршындагы «Бөтенроссия татар гаиләсе» фонды җитәкчесе Миләүшә Гайфуллина, шагыйрь, «Татар гаиләсе» фонды директоры Роберт Миңнуллин, «Татарстан» радиосы җитәкчесе Тәүфыйкъ Сәгыйтов... Җырчылар Рафаэль Ильясов, Зөһрә Шәрифуллина, Сәйдә Мөхәммәтҗанова, гармунчы Фәрит Хатыйпов... Һәм без – Сөембикә» журналы... Матур, мәгънәле, йөрәкләргә үтеп кереп уйландыра торган кичә булды ул. Бәхетле гаилә нинди була? Моңа төгәл генә берәү дә җавап бирә алмас. Бәхеткә, һәркемнең үз юлы, үз сукмагы. Кичә башында, райондашлары каршында мәңгегә бергә булырга вәгъдәләр бирешкән, никахлашкан Гүзәлия белән Илназ Минвәлиевләр ул көнне тормыш дигән озын юлга чыкты. Еллар узгач, Гүзәлия дә, үзен сыңар күзле килеш кияүгә алган Гасыймына гомер буе рәхмәтле булган Фәния апа бу кичәдә әйткән кебек: «Мин үземне бик бәхетле саныйм. 5 балам, 11 оныгым, 3 туруным, янымда алтын баганам – ирем бар», – дия алсын иде. Ә Илназ, Гасыйм абый кебек: «Без 57 ел бергә. Әле яшәмәгән дә кебек...» – дип өстәсен иде...