Астананың татар диаспорасы Муса Җәлил урамында өмә уздырды

Оештыручылар сүзләренчә, әлеге урамда өмә үткәрү күркәм гадәткә әверелгән

10 апрель көнне Казакъстан башкаласы - Астана шәһәренең Советлар Союзы Герое, шагыйрь Муса Җәлил хөрмәтенә аталган урамда экологик өмә узды. Акцияне оештыру башлангычы белән җирле этномәдәни берләшмәләр чыккан. Җыештыру өчен төп объект шәех Кунт-Хаҗи исемендәге мәчет территориясе булган.

"Муса Җәлил урамында өмә үткәрү күркәм гадәткә әверелде. Кагыйдә буларак, акцияне "Дуслык" Татар мәгърифәти-мәдәни үзәге оештыра. Быел безгә Астана Казакъстан халыклар ассамблеясы карамагындагы Аналар советы, "Таң" татар-башкорт үзәге, Дөнья хатын-кызлары дуслык үзәге, «PosadiDerevo.kz»нең төбәк иҗтимагый оешмасының башкала филиалы кушылды. Моннан тыш, Татарстан һәм Россиядән килгән кунаклар да теләктәшлек белдерде", - дип сөйләгән "Дуслык" үзәге җитәкчесе Җәннәт Низаметдинова.

Өмә тәмамлангач, җыелучылар мәчеттә Муса Җәлил һәм, гомумән,  Бөек Ватан сугышы кырларында башларын салучылар рухына дога кылды, дип хәбәр иткән Казакъстанның Татар һәм башкорт милли-мәдәни үзәкләре ассоциациясе вәкиле Ринат Дусумов.    

сылтама: http://tatar-inform.ru