​«Ак калфаклар» Актанышта

13 июльдә катнашучылар кунакчыл Актаныш җиренә аяк басты. Аларны район тарихы белән таныштыру, туган җирне өйрәнү музеена алып бару, элеккеге һәм бүгенге Актаныш турында фильм күрсәтү оештырылды. Утырышның беренче көне Киров авылы үзешчәннәре куйган спектакльне карау белән төгәлләнде.

14е көнне «Ак калфак» утырышы катнашучылары, биш маршрутка бүленеп, Актанышның төрле авылларына сәяхәт итте. «Без монда барыбыз да нәрсәдер өйрәнергә җыелдык. Аннары үз төбәкләребезгә кайтып, монда өйрәнгәннәрне гамәлдә кулланырга, милли гореф-гадәтләребезне киләчәк буынга да өйрәтергә тиеш булабыз», – дип билгеләп үтте оешма җитәкчесе Кадрия Идрисова. Шуның өчен дә маршрутлар авыллардагы истәлекле урыннарга сәяхәтне дә, төрле мастер-классларны да үз эченә алды. Әйтик, Такталачык авылына сәяхәт кылган делегатлар татарның беренче трагик артисты Мөхтәр Мутинга һәм халык шагыйре Гамил Авзалга элмә такта ачу тантанасында катнашты. Бәйрәмгә Мутин нәселе дәвамчылары, Гамил Авзалның кызлары килүе ямь өстенә ямь өстәде. 

Уразай авылында кунаклар ком белән самавыр чистарту, балчыктан кирпеч басу ише эшләрне башкарып карау мөмкинлеге алды. Ахырда бөтен килгән кешене авыл янындагы Җанбай күленнән тотылган балыктан пешерелгән шулпа белән сыйладылар. Ә кич белән күчмә утырыш кунаклары һәм бөтен Актаныш халкы «Агыйдел» дәүләт җыр һәм бию ансамбленең концертына җыелды.

Бүген, 15 июльдә, чараның пленар утырышы уза.