9 Майда нинди бәйрәм чаралары көтелә?

«Бүген республикада14 меңнән артык Бөек Ватан сугышы ветераны яши. Аларның 172се сугыш хәрәкәтләрендә катнашкан. Тыл хезмәтчәннәре, әсирлектә булганнар, блокадалы Ленинградта яшәгәннәр саны да әкренләп кимеп бара», – дип хәбәр итте Министрлар Кабинетында узган брифингта вице-премьер Ләйлә Фазлыева. 

Бөек Ватан сугышы ветераннары саны азаюга карамастан, сугыш чоры балалары  һаман да бу категориягә кертелми. Бүген журналистлар әлеге сорауны кабат күтәрде. «Законда каралмаган. Белгәнегезчә, Дәүләт Советы депутатлары берничә тапкыр сугыш чоры балаларына ветеран статусы бирү турында мөрәҗәгать белән чыкты, әмма нәтиҗәсе булмады. 9 май уңаеннан махсус күчтәнәч пакетлар бары тик ветераннарга гына тапшырыла. Ә менә бәйрәмнәрдә бөтен кеше катнаша ала», – белдерде хезмәт, мәшгульлек һәм социаль яклау министры Эльмира Зарипова. Быел бәйрәм чараларында илебез куркынычсызлыгын тәэмин итү максатларында махсус хәрби операциядә катнашып кайткан сугышчылар да катнашачак. 

Җиңү бәйрәме уңаеннан ветераннарны хөрмәтләүгә багышланган төрле чаралар ай буе дәвам итә. Ветараннар яшәгән йорт тирәләрендә концертлар оештырыла, музейларда мәдәни чаралар үткәрелә. Көтеп алынган вакыйга – 4 май көнне башкалада тимер юл вокзалының «Казан–2» терминалы мәйданында Казанга Хезмәт батырлыгы шәһәре исеме бирелү уңаеннан 26 метрлы стела ачыла.
Җиңү көнендә бәйрәм чаралары Җиңү паркында, Казан Кирмәнендә һәм Меңьеллык мәйданында уза.

9 Майда 10:00 сәгатьтә мәйданда Казан гарнизоны парады уза. Анда  юнармия хәрәкәтенә йөрүче балалар да катнашачак. Шунда ук тарихи техникаларны да карарга була. Тантаналы йөреш республиканың сәнгать әһелләре катнашында концерт белән дәвам итәчәк. Ул җырлаучы Казан форматында узачак. «Бөтенебез бергә Җиңүгә багышланган җырлар башкара алачакбыз», – дип белдерде Казан шәһәренең мәдәният идарәсе җитәкчесе Азат Афзалов.  Быел бәйрәм концертларында Россия йолдызлары чыгыш ясамый. Ул бары тик республика мәдәният хезмәткәрләре көче белән узачак икән. Концертларда барлыгы 1600 артист канаша. 

Концерт 22:00 сәгатьтә бәйрәм салюты белән төгәлләнәчәк. 

Куркынычсызлык чаралары көчәйтелгән режимда эшләгәнлектән, бәйрәмгә иртәрәк килүне сорады оештыручылар. Шулай ук 3, 7, 8, 9 май көннәрендә шәһәрдә транспорт хәрәкәте үзгәрәчәк. Игътибарлы булыгыз.

Фото: Республика Хөкүмәте сайтыннан алынды.