Сыер итеннән койка

Койка (холодец) – миллионлаган халыкның төрле уңайдан корылган табыннарда яратып ашый торган ризыгы. Әмма аның безнең организм өчен бик тә файдалы икәнен барыбыз да беләме икән? Койканың уңай сыйфаты шунда – анда коллаген булуы. Коллаген – тоташтыргыч тукыманың күзәнәкләре арасындагы җепсел аксым. Пешергән вакытта коллагенның файдалы күп өлеше югала, ләкин калган кадәресе дә безнең организм өчен бик тә кирәк. Тукымаларның картаю процессын киметә торган, сөяк белән кимерчәкләрнең уалуына каршы килүче сыйфатларга ия ул коллаген.

Койка пешергәндә, шулпасы үтә күренмәле килеп чыксын өчен, кыен булмаган берничә киңәшкә колак салыгыз әле. Уңышлар сезгә!

Кирәк:

* 2 кг сыерның тез баш сөяге, сыйрагы (мотолыжка);
* 7-8 л тирәсе су;
* 1,5 аш кашыгы тоз;
* 1 кишер;
* 1 баш суган;
* 2-3 данә лавр яфрагы;
* 1 баш сарымсак;
* чәй кашыгының 1/8 өлеше – төелгән кара борыч.

Иң элек итне бик әйбәтләп юабыз һәм бер 4-6 сәгатькә салкын суга җебетергә салап торабыз. Туңдырма пешерер өчен иң әйбәте: сыерның сыйрагы, тез башы, тояклары, койрыгы, тавык ите. Гомумән, итне үзегезнең карамактан чыгып сайлагыз. Әлеге туңдырмабыз сыер итеннән булыр.

Әзер итне кәстрүлгә салабыз. Итне томаларлык итеп су агызабыз. Кайнауга кадәр җиткергәч, суын түгәбез. Итне краннан агып торучы су астында әйбәтләп юабыз һәм тагын кәстрүлгә салабыз. Итне 7 см томалап калырлык итеп кенә су салабыз да утка куябыз. Су кайнап чыгуга, күбеген җыеп алабыз. Аннан, капкачын томалап, сүрән генә утка бер 4 сәгатькә кайнарга куябыз.

Шулкадәр вакыт кайнаганнан соң, хуш исле булсын өчен – кишер, алтынсу төскә керсен өчен әрчемичә генә кабыгы белән суган салып җибәрәбез. Тоз өстибез һәм тагын 2 сәгать кайнатабыз.
Пешеп җитәр алдыннан кыскыч аркылы чыгарылган сарымсакны, төелгән борыч, лавр яфрагы салып җибәрәбез.
Уттан алып, 20 минутлап дәмләндереп (настаивать) торабыз. Аннан тишек чүмеч белән ит һәм яшелчәләрне алабыз. Итне кисәкләргә бүлеп, койка савытларына салып чыгабыз, шунда ук, турап, кишерне дә салабыз.
Шулпаны сөзеп, ит өстенә агызабыз (чеснок белән лавр яфрагы инде хуш исләрен калдырды – аларны алып ташласак та була).
Койканың өстен яшелтәмләткечләр, горчица белән матур итеп бизибез.