Кукуруза оны белән әзерләнгән равиоли

Равиоли – итальян ризыгы, төрле-төрле эчлекләр белән пешерелгән макарон ризыгы. Безнеңчә әйтсәк, пилмән була инде.
Италия әдәбиятында равиоли турында инде XIII гасырда ук телгә алына. Баштарак ул сицилияләрнеке дип саналган. Без пешергән равиолилар исә гадәти генә түгел, ә глютенсыз кукуруза оныннан пешергәнгә күрә, диетик ризык.

Кирәк:

* 1 данә йомырка;

* 1 стакан бодай оны;

* 1 стакан кукуруза оны;

* 50 мл су;

* 1 чәй кашыгы төелгән баллы борыч (паприка);

* 1/2 чәй кашыгы тоз;

* 2 аш кашыгы зәйтүн мае.

Эчлек өчен:

* 125 г эремчек;

* 125 г бәрәңге;

* үсемлек маенда кыздырылган 2 баш суган;

* тәменчә тоз;

* табынга биргәндә янына кую өчен каймак.

Эш барышы:

1. Ике онны да бергә кушып, илибез. Уртасын чокырлап, йомырка сытабыз, зәйтүн мае салабыз.

2. Су өстәп, барысын бергә болгатабыз. Шунда ук тоз, паприканы да кушып җибәрәбез. Аннары инде бик каты итмичә камырны басабыз. Пилмән камыры кебек булырга тиеш.

3. Басып бетергәннән соң, камырны полиэтилен капка тыгып, ярты сәгатькә бер читкә алып куеп торабыз.

4. Эчлек өчен кыздырылган сугын, эремчек һәм пешкән бәрәңгене бергә кушып болгатабыз. Тәменчә тоз өстибез. Төерләрсез куе гына эчлек барлыкка килергә тиеш.

5. Камырны юка итеп зур җәемгә җәябез дә тигез тасмаларга теләбез.

6. Бер тасмага тигез аралар калдырып, эчлекне салып чыгабыз.

7. Аның өстеннән икенче тасманы каплап, шакмаклап кисәбез, кырыйларын чәнечке ярдәмендә ябыштырабыз. Равиолиларны башка төрле итеп тә ясарга була, мәсәлән – түгәрәк итеп.