Сюрпризлы коймаклар

Укучыларыбыз инде үз итеп өлгергән аш-су остасы Венера АРСЛАНОВА бу юлы бераз үзгәрәк ризык пешереп карарга тәкъдим итә. Аны әзерләү өчен кирәкле ризыклар да суыткычта һәрчак булып тора. Бризоль икенче аш буларак та, кайнар кабымлык буларак та яхшы. Аны үзең белән табигатькә чыкканда да алырга була. Кайнар килеш тә, суынгач та тәме үзгәрми.

Кирәк: 700 г фарш / 1 баш суган (150 г) / 200 г сыр / 150 г тозлы кыяр / 2 помидор / 9 йомырка / 150 мл сөт / яшел үләннәр / 200 г кибет каймагы / 3 теш сарымсак / тәменчә тоз-борыч, паприка / фаршны җәю өчен бер-ике уч он.

Эш барышы

1. Фаршка суган кушылмаган булса, бер баш эре суганны вак угычтан уып, иткә кушабыз. Тәменчә тоз-борыч, төелгән баллы борыч (паприка) өстибез һәм барысын бергә яхшылап катнаштырабыз. Әлеге күләмне 9 тигез өлешкә бүлеп, шарлар әвәлибез. 

2. Сырны эре угычтан уабыз, тозлы кыяр белән помидорны озынчарак итеп ваклап  турап  куябыз.

3. Сарымсакны вак угычтан уып яки пресстан издереп, каймакка кушабыз. Шунда ук ваклап туралган үләннәрне дә салып, барысын бергә болгатабыз.

4. Тирән тәлинкәгә бер йомырканы сытып, бер аш кашыгы сөт һәм тәменчә тоз кушабыз. Чәнечке белән яхшылап туглыйбыз. 

5. Ике полиэтилен пакет арасына куеп, иттән әвәләнгән бер шарчыкны уклау белән җәябез. Җәемнең зурлыгы өлеш тәлинкәсе кадәр булырга тиеш. Он сипсәң, итне җәю җайлырак.

6. Тугланган йомырканы зуррак сай тәлинкәгә бушатып, ит җәемен шунда каплыйбыз һәм аз гына май салынган кызган табага йомырка аста калырлык итеп шудырып төшерәбез. Өстен капкач белән каплап, һәр ягын дүртәр минут кыздырабыз. 

7. Әзер коймакны тәлинкәгә алып (итле ягы өстә калсын), сарымсаклы-каймаклы соусны ягабыз, аның өстенә сыр сибәбез һәм бер буй итеп туралган помидор белән кыярны куеп чыгабыз. 

8. Коймакны тәгәрәтеп төреп, рулет ясыйбыз.  Калган сигез йомырка һәм ит шарларыннан да шул рәвешле бризольләр пешереп бетерәбез. 

10. Өстен кетчуп һәм яшел үләннәр белән бизәп табынга  чыгарабыз. Янына яшелчәләр белән әзерләнгән чуар дөге, мичтә түтәрәмләп кыздырган бәрәңге яки башка төрле гарнир бирергә була. Үзе генә дә бик тәмле һәм туклыклы ул.