Мастер-классны Төркиядән килгән шеф-повар Өздән ЭРДОГАН үткәрә. Көндәлек ризыклардан да телеңне йотарлык ашлар әзерли белә ул.
Уңышының бөтен сере — соуста. Пешереп карагыз әле, сезгә дә ошамый калмас. Бәйрәм табынының күрке булырлык бу ризыклар белән кадерле кешеләрегезне сыйларсыз.
Кирәк:
(бер өлеш өчен)
* 200 г чамасы сөяксез ит;
* 1 зур бәрәңге;
* 5 теш сарымсак,
* 2-3 аш кашыгы сөт;
* 2 помидор;
* ярты стакан биойогырт
(аны катык яки кибет каймагы да алыштыра ала);
* сыек май;
* бер чеметем тоз.
Эш барышы:
Итне саламлап турыйбыз һәм вак угычтан уылган ике теш сарымсак кушабыз. Шуңа сөт һәм 2-3 аш кашыгы сыек май өстәп, итне 4-5 минут бик яхшылап болгатабыз – йомшак булсын өчен кирәк бу. Итне майлы табага салып 10 минут чамасы кыздырабыз.
Бәрәңгене, саламлап, бик юка итеп турыйбыз да майда йөздереп, тиз генә кыздырып алабыз. Фритюр казаныгыз булса, шунда кыздырыгыз.
Соус әзерлик:
Помидорларны турап, 2 теш сарымсакны вак угычтан уабыз. Табага май тамызып, барысын бергә суы кайнап беткәнче кыздырабыз. Бер чеметем тоз сибәбез. 10 минуттан соус әзер.
Йогыртка да вак угычтан уылган бер теш сарымсак кушабыз.
Барысы да әзер булгач, ризыкларны тәлинкәгә катлы-катлы итеп өябез. Башта бәрәңге, аннан соң ит, ит өстенә томатлы соус салып, табынга чыгарабыз.
Өздән Эрдоган,
Комментарий юк