Йолдызлы мастер-класс: "Альтернатива" салаты

Татарстанның атказанган артисты, җырчы, композитор Ләйсән МӘХМҮТОВА:
«Мин бу салатның ничек аталганын да белмим. Исемен улларым Сөләйман белән Йосыф кушты. Безнекеләр балыклы салат яратмый, ничектер илһамым килеп, шушы салатны ясап караган идем, барыбызга да бик ошады. Бәйрәмнәргә хәзер гел шуны әзерләргә тырышам», – дип, аш-су өлкәсендәге серләре белән уртаклашты «Зө-Ләй-Лә» төркеме кызларының берсе булган Ләйсән Мәхмүтова.

Кирәк:

- 200-250 г пешкән ит (сыер ите дә ярый, тавыкныкы да);

- 3 бәрәңге;

- 200 г шампиньон гөмбәсе;

- 1-2 кишер;

- 4 йомырка;

- 150 г сыр;

- 1 чөгендер;

- майонез;

- изәү өчен гранат төшләре һәм кара виноград.

Эш барышы:

яшелчәләрне пешереп суытабыз, кабыгын әрчибез. Гөмбәне телемләп турап, майлы табада әзер булганчы кыздырып алабыз.

Итне вак итеп турыйбыз да зур тәлинкә төбенә тигезләп салабыз.

Тәлинкә урынына һәркемгә аерым савытка ясарга да була. Алай оригиналь дә килеп чыга әле.

Без исә кечкенә пыяла савытлар кулландык. Пыяла аркылы салатның һәр каты матур булып күренеп тора.

Ит өстенә эре угычтан уылган бәрәңге түшәп, өстенә майонез ягабыз. (Без майонезны артык күп итеп якмадык.)

Чиратта – гөмбә, аннары эре угычта уылган кишер. Кишер өстенә дә майонез ягабыз.

Йомырканы вак угычтан уып, кишер өстенә тигезләп салабыз да аның өстенә уылган сыр сибәбез.

Сыр өстенә эре угычтан уылган чөгендер салып, өстеннән майонез ягабыз.

Салатның өстен кара төстәге виноград һәм гранат төшләре белән бизәп, табынга куябыз.