​Ярты сәгатьтә – оригиналь брошка!

Кирәк:

* фетр (башка тукымалар да ярый);
* кайчы;
* энә;
* җеп;
* синтепон яки мамык;
* каптырма;
* кәгазь, карандаш.
 

Эш барышы: 

Булачак брошканың өлгесен ясыйбыз. Без урталай киселгән алма ясарга булдык. Тукымага алманың ал һәм арт якларын күчереп, кисеп алабыз. (Әлеге өлгенең җайлы ягы шул, тукымага беренче катын күчергәннән соң, алманың рәсемен контур буйлап кечерәйтеп, икенче-өченче катларын да ясыйбыз.) Арткы ягына каптырма тегеп куябыз. Каптырма пөхтә һәм ышанычлы торсын дисәк, аны кечкенә тукыма кисәге астына яшерәбез. 

Алма өлгеләрен иң кечкенәсеннән башлап, бер-берсенә беркетә башлыйбыз. Тегә торган җепне зәвыгыгызга карап сайлагыз, ул тукыма төсендә дә, контраст төстә дә булырга мөмкин. Алманың сабагы турында да онытмыйбыз. 

Брошканың ике ягын да беркетәбез, зур булмаган авыз калгач, эченә кабартмыйча гына синтепон тутырабыз. Тегеп бетерәбез.