«Трость» техникасы белән ясалган алка

Кызларда төрле төстәге чәчәкләр, сурәтләр төшерелгән пластик алкалар, муенсалар күргәнегез бардыр. Ул чәчәкләр буяу белән ясалган дип уйласагыз, ялгышасыз. Юк! Алар пластиктан! Алка эченә ничек «кергән» соң бу бизәкләр? Сезгә шул серне ачам.

Кирәк:

* алсу, кара, шәмәхә, күк төсләрендәге пластик;
* алка асылмалары;
* тимерчыбык;
* фурнитура;
* каргаборын;
* пластик өчен махсус лак.

Эш барышы:

Алсу пластиктан биек булмаган цилиндр әвәлибез.

Куе алсу пластикны җәябез, цилиндр киңлегендәге берничә тасмага бүлгәлибез.

Цилиндрны урталай кисәбез, ике кисәге арасына куе алсу тасманы рәсемдәгечә урнаштырып, цилиндр кисәкләрен тоташтырабыз.

Цилиндрны кисеп, як-ягына тасмаларны урнаштыруны дәвам итәбез.

Цилиндрны уртасыннан башлап очларына таба ипләп кенә кыса башлыйбыз. Измичә генә тәгәрәтеп алабыз.

Барлыкка килгән таякны биш өлешкә бүләбез. Һәр өлешенең очын кысып, таҗ формалаштырабыз.

Куе алсу пластикны җәябез. Һәр таҗны куе алсу төскә төреп чыгабыз.

Шәмәхә пластиктан озынча таякчык ясыйбыз.

Таҗларны түгәрәкләп урнаштырабыз, уртасына шәмәхә пластикны куябыз.

Күк төсендәге пластик белән таҗлар арасындагы бушлыкларны тутыра башлыйбыз. Буш урыннар калмасын, югыйсә, эшләнмә матур булмаячак.

Чәчәкне уртасыннан башлап очларына тебе кыса башлыйбыз. Тәгәрәтмибез!

Кулыбызда - трость.

Хасил булган таякчыкның очларын кисепалабыз. Киселешендә - чәчәк рәсеме!

Калдык-постык пластиктан алка зурлыгындагы шарчык тәгәрәтәбез.

Күк төсендәге пластикны җәябез, шарчыкны шунда төрәбез.

Лезвие ярдәмендә «тростьне» телемлибез.

Чәчәкле телемнәрне шарчыкка ябыштырып чыгабыз. Тәгәрәтеп алабыз.

Шарчык бераз «ял итсен». Суытып алсагыз да яхшы.

Энә белән тишәбез.

Мичтә кыздырабыз.

Лаклыйбыз.

Алкаларны җыябыз.