Балчыктан — чәчәк бәйләме

Киләсе саныбызда - (2015, март) балчыктан эшләнгән элементлар кергән энә савыты ясарга өйрәтәчәкбез. Шул нисбәтле, балчык белән эш итүне исегезгә төшерә торсагыз була.

Балчыктан ясалган чәчәкләрне Казанга «алып килүче», полимер балчыктан әвәләү мәктәбе SOFT CLAY BY DECOның хуҗасы Инна Вазыйхова мастер-класс үткәрә.

Кирәк:

* Deco clay япон балчыгы;
* дымлы тастымал;
* тимерчыбык;
* кечкенә ваза.

Эш барышы:

Гардения чәчәк бәйләме ясар өчен кызыл һәм ак төсләрне катнаштырып изәбез – нәфис алсу төс хасил була.

Барысы унсигез шарчык (алтысы – кечерәк, алтысы – уртача, алтысы – эре шарчык). Учта тәгәрәтеп, балчыктан тамчы әвәлибез. Бармак белән изәбез.

Учны йомып, эчендә калган балчыкта уем ясыйбыз. Таҗлар вакытыннан алда кипмәсен өчен, аларны дымлы тастымал эченә салып барабыз.

Чәчәкне кечкенә таҗлардан башлап җыярга керешәбез. Соңгы рәттәге эре таҗларны икенче ягы белән тезәбез. Барлыкка килгән чәчәк сабагының артыгын өзеп алабыз, тимерчыбыкка утыртып, бер тәүлеккә кибәргә калдырабыз.

Үз кулларыгыз белән ясалган чәчәк бәйләме сезне сөендереп торса, кунакларыгызны исә таң калдырыр!