Тапшырылган хатлар

Айгөл Бариева: Ниһаять! Борчылам, дулкынланам... мөгаен төне буе йокламам... АЛАР белән очрашуга барам кебек... Аллага тапшырдым!
 


Айгөл Бариева сөйли: 
Кичәне нишләп сәхнәдә оештырмадың, дигән сорауга җавабым шул: әти-әнием бик кунакчыл кешеләр иде. Кичә дә дусларны, аларны белгән кешеләрне җыеп, моңаеп түгел, хатирәләр белән уртаклашып, җырлашып-биешеп, бер-беребез белән аралашып узуын теләдем.
Гомер шуның кадәр кыска, иртәгесен ни булачак беркем белми, без һаман чабабыз, дөнья куабыз, бер-беребзне күрергә дә вакытыбыз җитми кебек... Аралашу – интернет аша гына бит соңгы вакытта. Бу кичәдә исә без хатирәләргә чумдык, мәхәббәт турында, яшәү мәгънәсе турында уйлаштык. Әти-әнием рухы шат булгандыр дип уйлыйм. Безнең бу сөйләшүләр, сагынулар аларга дога булып ирешсен иде. 

Килгән барлык кунакларга – җырчыларга, артистларга, дусларга, туганнарга, кичәне оештыручыларга бик зур рәхмәт белдерәсем килә.

Гөлназ Фәйзрахманова: “Казанның бер ямьле киче. “Тапшырылган хатлар” китабы презентациясе, талантлы артист, чын ир-егет Шамил Бариев белән аның хатыны Гөлфия апаны искә алу кичәсе булды. Аларның мәхәббәтләре мәңгелек, чөнки Айгөлләре бар, нинди акыллы кияүләре, сылу оныклары үсеп җитте! Айгөл, театр артистларын чакырып, җырчыларыбызны җырлатып, безне барыбызны җыеп очраштырганың өчен мең рәхмәт! Син һәрвакыт җаныңдагы белән уртаклашып яшисең. Синең мәхәббәтең кичәдә катнашкан, кунакка килгәннәрнең һәммәсенә җитте. Җылы, йөрәктәгене якыннарыңа җиткерү кичәсе булды бу. Һәр чыгышны, һәр сүз сөйләүчене тын да алмыйча тыңладым. Хисләрем кубып тынычлана алмыйм, уйлыйм. Әти-әниеңне догадан калдырмыйча, балаларыгызның игелеген күреп шулай чибәр, үз сүзен әйтә белүче, дөньяга үз карашы булган тырыш ханым бул!


Инстаграмда
Айгөл Бариева: Бу җырны соңгы мәртәбә мин 1991 елны әтием белән җырлаган идем. Шуннан бирле аны һәрзаман ялгызым башкардым. Бүген исә аны җырлардай пар таптым - Г. Камал театр артисты Ришат Әхмәдуллинны! Мин бәхетле!

Ришат Әхмәдуллин: Айгөл, сиңа бу мөмкинлек өчен зур рәхмәт! Әтиең рухы шат булсын.
Дөнья шуның кадәр хикмәтле икән – 1991 елны туганмын гына әле мин...