«Зебра» варениклары 

Бу азык бик тиз әзерләнә, алар бик тә үзенчәлекле булып күренә. Натураль буяу итеп какао кулланабыз, ул шоколад төсенә керә. 

Әйдәгез, ясыйбыз... 

Кирәк: 

(камыр өчен) 

300 г он; 

1 данә йомырка; 

1 бал кашыгы үсемлек мае; 

125 мл су; 

1 аш кашыгы какао; 

ярты бал кашыгы тоз. 

Эчлек өчен: 

250 г 9% лы майлылыктагы эремчек; 

1 аш кашыгы кызгылт көрән (тростниковый сахар)  төсендәге шикәр комы; 

бер чеметем ванилин; 

1 йомырка сарысы. 

Табынга биргәндә: кибет каймагы; 

җиләк кайнатмасы яисә джем. 

Эш барышы: 

Иләнгән онның өстенә бераз уемтык ясап, шунда су, йомырка, тоз, үсемлек мае кушабыз. Чәнечке белән әйбәтләп туглыйбыз. 

Әле сыекча гына булган бу катнашманы икегә бүлеп, берсенә 1 аш кашыгы какао өстибез. Хәзер ике катнашмадан да камыр басабыз, ул пильмән камыры кебек булырга тиеш. 

Әзер камырны берәр савытка салып, өстен томалап 10-15 минутка куеп торабыз. 

Аннары камырның икесен дә җәябез. Ак камырның өстен су белән майлыйбыз да өстенә шоколад төсле камырны салабыз. 

Рулет сыман итеп төрәбез. 

Хәзер рулетны 1 см киңлектә итеп кисәбез. 

Шул арада эчлек әзерлибез – эремчеккә йомырка сарысы, ванилин, шикәр комы өстибез. 

Киселгән рулет кисәкләрен җәем итеп җәябез дә уртасына эчлек салабыз. Кырыйларын үзегезгә уңайлы булганча бөрәбез. Менә шундый буй-буй полуфабрикатлар килеп чыга. Хәзер инде шуларны тозлы суда кайнау кергәннән соң 4 минут кайнатырга кирәк. 

Әзер вареникларны табынга каймак белән яисә төрле-төрле җиләк кайнатмалары белән бизәп чыгарырга була. 

Тәмле булсын!