​Татлы – Казан күчтәнәче

Казаннан яңа гыйлемнәр белән китсеннәр әле, диюләре булды, ахрысы, «Азу» кафесының шеф-повары Венера ханым Чемпионат кунаклары, журналистларга татлы ясау буенча осталык дәресе күрсәтте. 

Нәрсә ул татлы, бер дә ишекткән әйбер түгел, дияргә ашыкмагыз әле. Бик борынгы бу ризыкны барыгызның да авыз иткәне бар, исемен генә белмисездер. Какка төргән чикләвекле күрәгә ул. Коръән ашларына әзерләми калмыйлар аны бездә.  

Хәер, күрәгә, дидем дә, аның эчлеге төрлечә була ала. Кемдер кара җимеш, кемдер финик хөрмәсеннән дә ясый. Бик җайлы ясала торган, тәмле һәм иң мөһиме – табигый татлы ризык – десерт бу. 

Кирәк: 

Как (җиләк кагы, алманыкы, карлыганныкы... кайсы да ярый); 

күрәгә; 

йөзем җимеше; 

әстерхан чикләвеге; 

кызартып кайнаткан баллы сөт (вареная сгущенка). 

 

Эш барышы:  

Күрәгәне яхшылап юып (ярты сәгатьләп чәй содасы салынган салкын суда тотсаң, барлык тузаны, чүп-чары суга чыгып бетә), аз гына су өстәп 15 минутлап пешерәләр. 

Пешкән күрәгә белән чикләвекне иттарткыч аша чыгарып, юылган йөзем җимеше, куертылган сөт белән кушып, туглыйлар. 

Өстәлгә бер кап полиэтилен элпә җәеп, какны салалар. Аның өстенә юка итеп күрәгәле-чикләвекле массаны ягалар. Кашыкны салкын суга тыгып алсаң, ягуы җайлырак. Аннары элпә ярдәмендә какны тәгәрәтеп төрәләр.  

Шунда ук чәй табынына бирсәң дә ярый, әмма бер сәгать суыткычта тотсаң, юка телемнәргә кисүе җайлы.  

 Балалар баллы яратучан була, конфет урынына шушы татлыны ясап карагыз әле.  


фото: автор