Десерт

АЛМА БЕЛӘН ЧИЯЛЕ ШТРУДЕЛЬ

Баллы штрудель бик популяр! Аны әзерләве дә бик тиз, бик җайлы. Аны табынга туңдырма белән бирсәң ярашлы (гармонично). Җиләк-җимешне үзегезнең карамактан тора. Иң мөһиме: әзерләү технологиясен аңлау.

Ике кеше өчен чүпрәсез катламлы камырның яртысы да җитә.

Кирәк:

* 250 г чүпрәсез катламлы камыр;

* 2 яшел алма;

* чия кайнатмасыннан 2 аш кашыгы чия;

* 2 аш кашыгы шикәр комы;

* 1/2 чәй кашыгы дарчин (корица);

* 1 чәй кашыгы кукуруз крахмалы;

* 30 г атланмай;

* уртача зурлыктагы 1 йомырка.

Табынга бирер өчен:

* шикәр комы;

* пломбир;

* мүк җиләге.

Эш барышы:

1. Алманы әрчеп, шакмаклап турыйбыз.

2. Атланмай салып, алманы табага түшибез.

3. Песок, дарчин өстәп, йомшаганчы кыздырабыз.

4. Чияне юып, саркытабыз. Җиңелчә кипшертеп алабыз һәм алмалар янына салабыз.

5. Эчлек әзер булгач, суытып, 1 чәй кашыгы кукуруз крахмалы яисә кукуруз оны өстибез.

6. Катламлы камырны юка итеп җәябез, кырыйларына җитмичә эчлек җәеп чыгабыз.

7. Рулет итеп төрәбез.

8. Миксер белән күпертелгән йомырка белән сылыйбыз.

9. Штрудельне 25-30 минутка алдан ук 230 градуска кадәр җылытылган духовкага куябыз. Камыры алсулана башласа, әзер дигәнне аңлата. Духовкадан алып, шикәр пудрасы сибәбез.