Илдә үз Балалар йорты булган 13 хатын-кызлар төзәтү колониясе бар. Аларда якынча 400 бала тәрбияләнә. Болар – иректән мәхрүм ителү урыннарында туган балалар. Алар чәнечкеле койма артында яшәүләрен аңламый. Иң мөһиме – әниләре яннарында. Бала өчен моннан да зуррак бәхет бармы соң? Яратудан туганмы алар, өметсезлектәнме, өстенлекләргә ия булыргамы йә тизрәк иреккә чыгар өчен инструмент буларакмы – моңа җавап бары әни кешенең күңелендә. Бала рәшәткә артындагы хатын-кызны үзгәртә аламы? Әлеге сорауга җавап табар өчен Россиядә иң зур Балалар йорты булган Түбән Новгородның икенче санлы хатын-кызлар төзәтү колониясенә юл тоттык.
