«Казан Экспо» күргәзмәләр үзәгендә, ниһаять, концерт. Моңа кадәр дә анда тантаналар узды узуын, әмма аларга белүемчә, түрәләр, чакырылган кунаклар гына килде. Ә «Барс Медиа» үткәргән ТМТV музыкаль премияләр бирү тантанасына билет сатып алып, теләгән һәркем бара алды. Күргәзмәләр үзәге Казаннан 20 чакырымнан артык читтә, аэропорт янында урнашкан. Компания бу ягын уйлаган – шәһәрдән махсус трансфер оештырган. Ә Башкорстанда яшәүче җырчыларга концерт залы урнашкан урын бик җайлы булып чыкты. Айдар Галимов белән Ришат Төхвәтуллин аэропорттан туп-туры концерт залына килеп кергәннәр.
