Телефон тотып бәдрәфтә утыру нәрсәгә китерә?

Гарвард галимнәре үткәргән тикшеренүләрдән соң шундый нәтиҗә ясалган: бәдрәфтә утырганда смартфон кулланучыларда геморрой барлыкка килү ихтималы телефон кулланмаган кешеләр белән чагыштырганда 46 процентка югарырак. Моңа стресс та, дөрес тукланмау да түгел, ә нәкъ менә «озаклап утыру» сәбәпче. Тикшерелгән 125 пациентның 66 проценты бу начар гадәте барлыгын әйткән. Алар арасында геморрой очраклары аеруча ешрак булган.

Без бер нәрсәне онытып җибәрәбез: социаль челтәрләр вакытны оныттыру өчен махсус эшләнгән. Әйе, әйткәнебезчә, элек тә кешеләр бәдрәфкә газета яки китап алган. Ләкин алар социаль челтәрләр кебек вакытны оныттырмаган. Хәзер күпләрдән ишетергә була: «кулыма телефонымны биш минутка гына алган идем, бер сәгать үтеп тә киткән». Уңайлы бәдрәфтә дә вакыт турында онытырга бик мөмкин. Моны сораштырулар да раслый:
– Смартфон кулланучыларның 37 проценты бәдрәфтә 5 минуттан артык утыра;
– Телефон кулланмаганнар арасында бу күрсәткеч нибары 7 процент.

Күрәсез, аерма җиде тапкыр күбрәк. Димәк, авыру барлыкка килүчеләр саны да арта. Ә «озаклап утыру» чынлап та җитди авыруларга китерергә мөмкин. Артык озак утыру туры эчәклекнең кан тамырларына көчле басым ясый. Ә бу исә геморрой, арт юлда җәрәхәтләр һәм хәтта туры эчәкнең төшүенә китерү куркынычын тудыра. Гомумән, смартфонсыз да озаклап утыру зарарлы: ул әкренләп тукымаларны йомшарта, кан тамырларын зурайта. Шуңа табиблар киңәш итә: «5 минут эчендә нәтиҗә юк икән, бәдрәфтән чыгыгыз. Кирәк булса, бераздан яңадан керерсез».

Бәдрәфтә смартфон белән утырырга яратучылар нәрсә эшли соң? Бу уңайдан да социаль тикшеренүләр уздырылган: 66 проценты социаль челтәр актара, 40 проценты видеолар карый, 37 проценты хәбәрләргә җавап бирә, 36 проценты яңалык укый. Хәтта «интим эш» вакытында видео аша шалтыратучылар да бар икән.

Россиядәге 65,9% кеше бәдрәфкә телефоннарын алып керә.