Ни өчен эсселек куркыныч?

Кеше организмының нормаль температурасы уртача 36,5–37 градус тәшкил итә. Тышкы температура бик күтәрелгәндә организм тир бүленеп чыгару аша суына. Әмма һава артык кызу һәм дымлы булса, бу механизм җитәрлек дәрәҗәдә эшләми башлый. Нәтиҗәдә: кан басымы үзгәрә; йөрәккә йөкләнеш арта; организм су һәм минераллар югалта; хәлсезлек, баш әйләнү барлыкка килә; җылылык сугуы куркынычы арта.

Аеруча өлкән яшьтәгеләр, йөкле хатын-кызлар, кечкенә балалар һәм йөрәк-кан тамырлары авырулары булган кешеләргә сак булырга кирәк.

 Су эчү – иң мөһим кагыйдә

Эссе көннәрдә организм тир белән күп күләмдә сыеклык югалта. Шуңа күрә сусауны көтеп тормыйча ук су эчәргә кирәк.
Белгечләр сәламәт кешегә көненә уртача 1,5–2,5 литр чиста су эчәргә киңәш итә. Әгәр кеше күп хәрәкәт итә яки озак вакыт ачык һавада эшли икән, бу күләм артырга мөмкин.

Иң яхшысы: чиста су; газсыз минераль су; шикәрсез үлән чәйләре; өйдә әзерләнгән морслар; лимонлы су.

Ә менә газлы татлы эчемлекләр, артык күп кофе һәм көчле кара чәй организмнан сыеклыкның тизрәк чыгуына китерергә мөмкин.

 Өйдә җиңел генә әзерләп була торган салкын эчемлекләр

 Лимон һәм бөтнекле су

Кирәк булачак: 1 литр салкын су; ярты лимон; берничә бөтнек яфрагы; теләк буенча боз кисәкләре.
Лимонны юка телемләп турагыз, бөтнек белән бергә суга салыгыз. 20–30 минут суыткычта тоткач эчәргә мөмкин. Бу эчемлек сусауны яхшы баса.

 Кыярлы су

Кирәк булачак:1 литр су; ярты кыяр; берничә лимон телеме; укроп яки бөтнек.
Кыяр организмны дым белән тәэмин итә, ә лимон рәхәт тәм өсти.

 Җиләкле морс

Кирәк булачак: 200 грамм кара карлыган, кура җиләге яки мүк җиләге; 1 литр су.

Җиләкләрне изеп су белән болгатыгыз. Теләсәгез, аз гына бал кушарга мөмкин.

Дөрес туклану эсселекне җиңеләйтә

Эссе көннәрдә организмга авыр ризык эшкәртү дә катлаулырак.

Шуңа күрә менюда күбрәк булсын: кыяр; помидор; карбыз; кавын; яшел тәмләткечләр; җиләк-җимеш; салатлар; сөт ризыклары.

Ә менә майлы ит ризыкларын, кыздырылган ашларны һәм артык баллы камыр ризыкларын көннең иң кызу вакытында ашамаска киңәш ителә.

Кайсы сәгатьләрдә кояшка чыкмаска?

Табиблар сәгать 11дән 16га кадәр туры кояш нурлары астында мөмкин кадәр азрак булырга киңәш итәләр. Әгәр эш буенча урамда булырга кирәк икән, баш киеме киеп йөрергә, күләгәдә ешрак ял итәргә һәм су эчәргә кирәк.

Нинди кием сайларга?

Җәйге челләдә иң уңайлысы:  җитен; мамык; юка вискоза кебек табигый тукымалар.
Кием иркен, ачык төстә булса, тән артык кызмый. Кара төстәге һәм синтетик тукымалар исә кояш җылысын күбрәк сеңдерә.

 Өйне ничек салкын тотарга?

Эссе көннәрдә: иртән һәм кич тәрәзәләрне ачып җилләтергә; көндез пәрдәләрне ябып торырга; көнкүреш техникасын мөмкин кадәр азрак кулланырга;
 дымлы җыештыру ешрак үткәрергә. Бүлмәдә дымлылык җитәрлек булса, эсселек тә җиңелрәк кичерелә.

 Җылылык сугуының билгеләре

Әгәр кешедә: көчле баш авыртуы; баш әйләнү; күңел болгану;тән температурасының күтәрелүе; хәлсезлек;аң буталу күзәтелә икән, аны кичекмәстән күләгәгә күчерергә, салкын су эчерергә, маңгаена һәм муенына салкын компресс куярга кирәк. Хәл яхшырмаса, табибка мөрәҗәгать итү зарур.

Эсселекне җиңүнең иң нәтиҗәле ысуллары – җитәрлек күләмдә су эчү, дөрес туклану, туры кояш нурларыннан саклану, җиңел кием сайлау һәм физик активлыкны көннең салкынрак вакытына күчерү. Гади генә күренгән бу киңәшләр организмны сусызланудан, җылылык сугуыннан һәм башка күңелсез хәлләрдән сакларга ярдәм итә.