Яңа ел – 2027! Яңа ел корпоративына татар эстрадасы йолдызын чакыру күпмегә төшәчәк?

Яңа ел бәйрәмнәре якынлашкан саен корпоратив кичәләргә әзерлек тә кыза бара. Кемдер бәйрәм табыны турында кайгырта, кемдер кунаклар өчен кызыклы программа әзерли. Ә кичәнең иң истә калырлык мизгелләреннән берсе – яраткан җырчыңның сәхнәгә чыгуы. Әмма татар эстрадасы йолдызлары белән бергә җырлап, бәйрәм итүнең бәясе күпме икән?

KazanFirst сайтына чаралар оештыручы блогер Гүзәл Гайнетдинова татар эстрадасы артистларының быелгы Яңа ел корпоративларындагы чыгыш бәяләре 400 мең сумнан башлануын белдергән.

Быел Татарстанның атказанган артисты Фирдүс Тямаевны бәйрәм кичәсенә чакыру 800 мең сумга төшәчәк икән. Татарстанның халык артисты Гүзәл Уразованың чыгыш бәясе исә 400 мең сумнан башлана.

Башкортстанның атказанган артисты Марат Яруллинның 10–12 җырдан торган программасы өчен 600 мең сум түләргә кирәк. Татарстанның атказанган артисты Илсия Бәдретдинова Яңа ел корпоративында чыгыш ясаган өчен кимендә 500 мең сум сорый.

Татар эстрадасының танылган җырчысы, Татарстанның халык артисты Салават Фәтхетдиновның 40 минутлык чыгышы 500 мең сумга бәяләнә.

Күргәнебезчә, артистларның чыгыш бәяләре шактый аерыла. Шулай да бер нәрсә уртак: Яңа ел кичәсенә танылган җырчыны чакыру – оештыручылар өчен һич тә аз чыгымлы эш түгел. Әлеге суммалар артистның чыгыш вакытына һәм программа күләменә бәйле рәвештә билгеләнә.

Шулай итеп, Татарстанда Яңа ел корпоративына танылган артист чакыру өчен 100–150 мең сумнан башлап миллион ярым сумга кадәр акча түләргә туры килә. Соңгы бәя артистның популярлыгына гына түгел, ә чыгышның озынлыгына, команда составына, техник таләпләргә һәм чара узачак урынга да бәйле.

2025 елда иң кыйммәтле артистлар исемлегенә кемнәр кергән?

Башкортстанның халык артисты Элвин Грейга (Радик Юльякшин Яңа ел корпоративында якынча 1,5 сәгатьлек чыгышы өчен 1,5 млн сум сораган, дип яза «БИЗНЕС Online. 

Миллион сумлык гонорар алучылар арасында Ришат Төхвәтуллин һәм Марат Яруллин да булган икән. 

Хатын-кыз җырчылар арасында иң кыйммәтлеләрнең берсе – Илсия Бәдретдинова булган. Аның гонорары 800 меңнән 1 миллион сумга кадәр исәпләнгән. Сайдә Мөхәммәтҗанованың чыгышы 300 мең сумнан башланып,  коллектив белән килгән очракта 500 мең сумга кадәр күтәрелгән.

Башка танылган артистларның бәяләре дә шактый югары:

Фирдүс Тямаев – 700 мең сум;

Айдар Галимов – 350–500 мең сум;

Эльмира Кәлимуллина – 400 мең сумнан;

«Ямьле» триосы – 500 мең сумнан;

Салават Фәтхетдинов – 350–400 мең сум.

Шулай итеп, 2025 елда Татарстанда Яңа ел корпоративларына артист чакыру бәясе 100 мең сумнан башланып, 1,5 миллион сумга кадәр җиткән. Гонорар бәясе чыгышның озынлыгына, коллектив составына һәм техник таләпләргә дә бәйле.

Чыганак: «БИЗНЕС Online», 2025 елның 30 ноябре.