Бер әйберне онытсаң да, ялның тәме китә: чемоданга нәрсә салырга?

Ял – ел буе көтеп алынган иң күңелле чорларның берсе. Аның җаның теләгәнчә үтүе күп очракта дөрес җыенудан тора. Алдан төзелгән исемлек буенча чемодан тутыру артык мәшәкатьләрдән коткара, кирәкле әйберләрне онытмаска кирәген искәртә һәм шәп сәяхәт вәгъдә итә.

Җәй җитү белән күпләр ялга чыгу турында уйлана башлый. Кемдер диңгез буена юл тота, кемдер тауларга, урманга ашкына яки авылга кайта, ә кайберәүләр чит илләргә сәяхәт итә. Ялның күңелле үтүе күп очракта алдан әзерләнүгә бәйле. Иң еш очрый торган мәсьәләләрнең берсе – чемоданны дөрес җыю. Кирәкле әйберләрне онытмау ял вакытында өстәмә чыгымнардан һәм уңайсызлыклардан саклый.

Әгәр дә сез «ялга киткәндә нәрсәләр алырга?» дигән сорауга җавап эзлисез икән, бу язма аша сәяхәт өчен кирәк булган мөһим әйберләр, файдалы киңәшләр һәм чемодан җыю серләре белән таныша аласыз.

Иң мөһиме – документлар

Сәяхәткә чыкканда иң беренче чиратта документларны тикшерергә кирәк. Алар булмаса, хәтта иң яхшы планлаштырылган ял да өзелергә мөмкин.

Үзегез белән түбәндәгеләрне алырга киңәш ителә:

• паспорт яки шәхси таныклык;
• чит ил паспорты (кирәк булган очракта);
• самолет, поезд яки автобус билетлары;
• кунакханә броне турында мәгълүмат;
• медицина иминияте;
• банк карталары һәм бераз күләмдә акча.

Белгечләр документларның күчермәләрен телефонда, электрон почтада яки болыт саклагычында тотарга киңәш итә. Бу документ югалган очракта ярдәм итәчәк.

Чемоданны артык тутырмагыз

Күпләр ялга барганда «бәлки кирәк булыр» дип бик күп әйбер ала. Нәтиҗәдә чемодан авырая, ә киемнәрнең яртысы бөтенләй кулланылмый.

Кием сайлаганда ялның озынлыгын, һава торышын һәм ял төрен исәпкә алу җитә.

Иң кирәкле киемнәр:

• көндәлек киемнәр;
• эчке кием;
• оекбашлар;
• уңайлы аяк киеме;
• кроссовка яки сандали;
• баш киеме;
• кичке салкын өчен җиңел кофта яки куртка;
• йокы киеме.

Әгәр диңгез буена барасыз икән, коену киемен һәм җиңел пляж киемнәрен дә онытмагыз.

Шәхси гигиена чаралары һәрвакыт кирәк

Күп кунакханәләрдә төп гигиена чаралары булса да, үзегез күнеккән әйберләрне алу күпкә уңайлырак.

Чемоданга түбәндәгеләрне салыгыз:

• теш щеткасы һәм пастасы;
• шампунь;
• душ геле;
• сабын;
• тарак;
• дезодорант;
• бит һәм тән өчен крем;
• кояштан саклаучы крем;
• дымлы салфеткалар;
• кәгазь салфеткалар.

Сыеклыкларны махсус кечкенә шешәләргә күчерсәгез, урын да азрак алачак.

Дарулар турында алдан уйлагыз

Ял вакытында сәламәтлек белән бәйле вак-төяк мәсьәләләр килеп чыгарга мөмкин. Шуңа күрә кечкенә генә юл аптечкасы һәрвакыт кирәк.

Анда булырга мөмкин:

• температура төшерүче дарулар;
• авыртуны басучы препаратлар;
• аллергиягә каршы дарулар;
• эч авыртуына каршы чаралар;
• пластырь;
• бинт;
• антисептик;
• шәхсән үзегезгә кирәк булган дарулар.

Чит илгә чыкканда кайбер даруларны илгә кертү кагыйдәләрен дә алдан өйрәнергә кирәк.

Электроникасыз ялны күз алдына китерү кыен

Бүген сәяхәттә телефон – элемтә чарасы гына түгел, ул карта, фотоаппарат, банк картасы һәм юл күрсәткече вазыйфасын да башкара.

Шуңа күрә үзегез белән алыгыз:

• смартфон;
• заряд җайланмасы;
• пауэрбанк;
• колакчын;
• фотоаппарат (теләк буенча);
• чит ил өчен электр адаптеры.

Заряд җайланмаларын аерым кечкенә сумкага салу аларны тиз табарга ярдәм итә.

Балалар белән сәяхәт иткәндә

Балалар белән ял итү аеруча игътибар сорый.

Онытмагыз:

• балалар өчен кием запасы;
• подгузниклар;
• дымлы салфеткалар;
• балалар дарулары;
• яраткан уенчык;
• юл өчен ризык һәм су.

Озын юл вакытында китаплар, буяу альбомнары яки кечкенә уеннар да файдалы булачак.

Диңгезгә ялга баручыларга киңәшләр

Диңгез буенда ял иткәндә кояштан саклану иң мөһим шартларның берсе булып тора.

Үзегез белән алыгыз:

• кояш күзлеге;
• панама яки эшләпә;
• SPF 30–50 дәрәҗәсендәге саклау кремы;
• пляж сөлгесе;
• пляж сумкасы;
• су үткәрми торган телефон тышлыгы;
• кабат кулланыла торган су шешәсе.

Көннең иң эссе вакытында туры кояш астында озак йөрмәү дә сәламәтлек өчен мөһим.

Табигатькә яки тауларга барганда

Актив ял яратучылар өчен җиһазлар аеруча әһәмиятле.

Кирәк булачак:

• уңайлы треккинг аяк киеме;
• җылы кием;
• фонарь;
• термос;
• репеллент;
• кечкенә рюкзак;
• пауэрбанк;
• яңгырдан саклаучы кием.

Маршрутка чыгар алдыннан һава торышын өйрәнергә һәм туганнарыгызга кайсы якка баруыгыз турында хәбәр бирергә киңәш ителә.

Чемоданны дөрес җыюның берничә сере

Тәҗрибәле сәяхәтчеләр берничә гади кагыйдәне һәрчак куллана.

Беренчедән, сәяхәткә берничә көн кала исемлек төзергә кирәк. Бу ашыгып җыенудан саклый.

Икенчедән, киемнәрне төреп кую (төргәк итеп әйләндерү) чемоданда урынны шактый экономияли.

Өченчедән, авыр әйберләрне чемодан төбенә, ә еш кулланыла торганнарын өске өлешкә урнаштыру уңайлы.

Дүртенчедән, документларны, даруларны һәм заряд җайланмаларын кул сумкасына салу хәерле.

Ял алдыннан тикшерү исемлеге

Өйдән чыгар алдыннан үзегезне кабаи тикшерегез:

• Документлар үзем беләнме?
• Телефон һәм заряд җайланмасы алынганмы?
• Дарулар чемодандамы?
• Банк картасы һәм акча бармы?
• Өйдә утлар, су һәм газ сүндерелгәнме?
• Тәрәзәләр һәм ишекләр ябылганмы?

Бу гади тикшерү күп кенә күңелсез хәлләрдән саклап кала.