Петуния урынына...

Ел да шул бер петуния үстерү туйдырса, аның урынына башка гөл үстерәсегез килсә, бу язма сезнең өчен. Петуния кебек, җәй буена чәчәк атсын ул, нәзберек тә булмасын дисез икән, бер вариант тәкъдим итәбез. 
Аның чәчәкләре генә түгел, яфраклары да матур;
ул эссегә чыдам;
корылыкны җиңел кичерә;
кояш күзендә дә яхшы үсә;
чәчәккә күмелгән шарны хәтерләтә.
Бу гөл катарантус дип атала. 
Катарантус та, петуния кебек, орлыктан үстерелә. Аннан аермалы буларак, катарантусyың орлыклары эрерәк, чәчү өчен җайлырак. 
Рассадага февраль-март айларында чәчәләр. Иртәрәк чәчсәгез, чәчәкләрен дә иртәрәк күрәчәксез. Ләкин кыш көне чәчкәне ясалма яктыртырга туры киләчәк. Андый мөмкинлек булмаса, бу эшне мартка калдырыгыз. 
Катарантусны үстерүе кыен түгел – вакытында суын сибеп, вакытында ашлап торсаң, ботак очларын чеметеп өзеп алгаласаң – ул өзлексез чәчәк атып, сезне җәй буена куандырачак. 
Орлыкларны көпшәк туфракка, 0,5 см тирәнлегендәге буразналарга чәчәләр. Тишелеп чыкканчы, савытны 27 градуслы җылы урында тоталар. Үсентеләр бераз исәйгәч, 300-400 миллилитрлы аерым савытларга күчереп утырталар. Катарантус күчереп утыртуны бик яратмый, шуңа күрә тамырларын зәгыйфьләмәскә тырышырга кирәк. Җылыны ярата.
Даими урынга аны кыраулар беткәч кенә утырталар. Катарантус комлы, ташлы, иң ярлы туфракларда да яхшы үсә. Аны көндез кояш пешерә торган урынга да утырта аласыз. 
Әлбәттә, бер генә гөл дә икенчесен кабатлый алмый. Петуния үзенчә матур, катарантус – үзенчә. Шуңа күрә катарантус петунияне тулысынча алыштыра дип әйтү хата булыр иде.