Ноябрь аенда нәрсәләр чәчәргә була?

Урамда – кара көз. Бер уйласаң, бакчада инде барча эшләр дә беткәндер кебек. Ләкин... нәкъ менә хәзер – җир катырыр алдыннан кайбер үсемлекләрне чәчеп калдырсаң, яз көне эш азрак булачак. 
Салкынга чыдам үсемлекләрдән кишер, редис, петрушка, куроп, сельдерей, чөгендер, пастернак, кузгалак, шпинат, кориандр, эстрагонны мисалга китерергә була. Боларны көздән чәчәеп калдырсаң, яз көне иртәрәк тишелеп чыгып, уңышны да иртәрәк бирә. 
Ләкин бер проблемасы бар – кыш карсыз килсә, чәчкән орлыклар өшергә мөмкин. Шуңа күрә орлыкларны яз көне чәчкәнгә караганда күбрәк алырга һәм тирәнрәк күмдерергә, түтәл өстен коелган яфраклар беән капларга кирәк. 
Икенче проблема –  көздән чәчелгән үсемлекләр җәй башында ук чәчәк сабагы чыгарып, орлык өлгертә башларга мөмкин. Бу аларның стресс кичерүе аркасында килеп чыга. Шуңа да көздән чәчеп калдырыр өчен орлыкларның «устойчив к стрелкованию», «холодостойкий» булганын сайлагыз. 
Кәбестәнең дә кайбер сортларын көздән үк чәчәеп калдырырга була. Мәсәлән: кызыл башлы кәбестә, пекин кәбестәсе, чәчәк кәбестә салкынга чыдам.
Газон орлыгын да көздән чәчеп калдыру отышлырак. Тишелеп чыгу өчен ул дымны күп сорый. Ә иртә язда – туфракта дым күп булганда әле бакчага керерлек булмый. 
Кайбер чәчәк орлыкларын да көздән чәчеп калдырырга мөмкин. Болар – астра, календула, космея, мәк, ромашка, гвоздика, карпат кыңгырау чәчәге, дельфиниум, примула, лаватера, аквилегия, эшшольция. 

фото: https://pixabay.com/ru