Газинур Морат... Аның шигырьләреннән серлелек, моң, романтизм агыла. Батулла әйткәнчә, «Газинур шигыре сине Бетховенның «Айлы соната»сына алып килә». Ул – көрәшче шагыйрь дә: шигырьләре тыгыз фикерле, публицистик яңгырашка ия. Өр-яңа миф-риваятьләр уйлап чыгару, канатлы сүз булып китәрдәй тирән мәгънәле гыйбарәләр куллану, көтелмәгән чагыштыру-метафоралар, поэтик алымнар... Болары да нәкъ Газинурча.
