Гөлинә Шәйхи... Актриса, шагыйрә, җырлар авторы, «Китап» милли радиосының тапшырулар редакторы, үткен каләмле журналист... Балтач районы Бөрбаш авылы кызы мәктәп елларында ук йә театр, йә радио-телевидение дип хыялланган. Казан дәүләт мәдәният институтының театр факультетында режиссура бүлеген тәмамлаган. Әтнә драма театрында эшләгән. «Үзеңнән качып булмый, һәр шигыремдә бер бөртек булса да Мин бар...» дип язган, үзенең «Шигырьләрем аша аңларсыз» дигән төркемен булдырган Гөлинәне исә шигърият сөючеләр аеруча якын итә. «Сөю бүләк итәм» дип аталган беренче җыры исә шундук популярлык алып килә. Хисләрен шигырьгә йә җырга салып, укучыларны уйландыра, сагышка-моңга күмә белгән, сүзен кыю итеп әйтә алган үзенчәлекле шагыйрәнең бер шәлкем шигырьләре «Түгеләсем килә...» дип атала.
