«Безнең җыр» лабораториясе концертында – Илһам Шакиров рояле

Татар интеллектуаль җырчылары бер мәйданга җыелды. Май аенда  «Калеб» яңа буыны җыены яшь башкаручыларны, шагыйрь һәм композиторларны берләштергән «Безнең җыр» лабораториясен башлап җибәргән иде.  Ул ике этапта узып, финалга җитте. Бу уңайдан оештырылган матбугат очрашуында проект җитәкчесе, Кариев исемендәге яшь тамашачылар театры директоры Гүзәл Сәгыйтова лабораториядә иҗат ителгән аерым җырлар язмышы өчен борчылуын белдерде.  

 «Безнең җыр» лабораториясендә 34 яңа җыр туа. Моның өчен жирәбә салу юлы белән катнашучылар шагыйрь, композитор  һәм җырчыдан торган  17 команда төзелә. Алар барысы да  татар сәнгатенә «яңа сулыш» өргән иҗатчылар: Рүзәл Мөхәммәтшин, Йолдыз Миңнуллина, Луиза Янсуар, Эльмира Җәлилова, Гөлүсә Батталова, Эльмир Низамов, Ильяс Камал, Резеда Гарипова, Мәдинә Галиева, Алсу Сөнгатуллина, Эльмира Кәлимуллина, Филүс Каһиров, Айгөл Хәйри, Илүсә Хуҗина, Алсу Фәйзуллина, Илнар Миранов һәм башкалар.  Проектның икенче этабында да  әлеге иҗатчылардан яңа команда төзелеп, тагын 17 җыр языла.  

«18 декабрьдә  лабораториянең финал концертына җырлар сайлау этабы узачак», – дип хәбәр итте матбугат очрашуында Гүзәл Сәгыйтова. 10 җырны – экспертлар шурасы, берсен  тамашачылар  тавыш бирү юлы белән  сайлап алачак. Концерт «Татар-информ» сайтыннан трансляцияләнәчәк. Димәк, интернет-тамашачылар да тавыш бирә ала.  Концертка Илһам Шакировның роялен алып килергә уйлыйлар. Гала-концертны киләсе елга – ТАССРның 100 еллыгы уңаеннан зурлап үткәрергә җыеналар.  Әлеге проектның төп максаты:  яшь иҗатчыларны берләштерү, таныштыру. Композитор Эльмир Низамов әлеге проектта катнашып, яңа иҗади тандемнар табуы хакында әйтте.  

Финанслау  зур булмаганлыктан, әлеге җырларны радио-телевидениегә ротациягә бирү мөмкинлеге юк. Дөрес, танылган башкаручыларның җырлары киң аудиториягә таралу мөмкинлеге зур. Ә менә яшь, танылып өлгермәгән җырчыларга нишләргә? Нәрсә генә дисәң дә, радио-телевидениедә ротациядә булган җырлар халык колагына тизрәк «эләгә». Гүзәл Сәгыйтова, әлеге мәсьәләне бераз булса да хәл итү максатыннан, «Татарстан–Яңа гасыр» телерадиокомпаниясенә хат язуларын әйтте. Алар әлеге проектны «Голос. Дети.»  форматында төшерергә мөрәҗәгать иткәннәр. Әлегә җавап көтәләр.