Абыстайлар селфи төшә, качкыннар геолокация куллана яки «Зәңгәр шәл» – remake

Дөресен әйтим, бу концерт– спектакльгә мине кызыксыну гына алып килде. Эстрада артистлары спектакль куя, үзләрен театр артисты ролендә сыный, дигәч, җомга киче булуы да, урамда койган яңгыр да комачауламады. Әле спектакльнең дә ниндиен сайлаганнар – легендар «Зәңгәр шәл»не бит! Зур-зур артистлар димим дә инде, әз-мәз җырлаштырып, авыл клубларында куелган кичәләрдә катнашып йөргәннәрнең дә кайсысы гына үзен Мәйсәрә урынында күрергә теләмәде икән? Ә Булат! Ул рольдә, әлбәттә инде, авылның син күз атып йөргән иң чибәр егете булырга тиеш. Уф, күз алларына гына китерсәң дә тәннәр чемердәп куя! Колакта гаярь егетләр, чибәр кызларның: «Булат, Булат кайткан! Бүләк алып кайткан!» – дип дәртле җырлаганнары яңгырап киткәндәй була. Кемнәр генә, нинди генә коллектив куйса да, Кәрим Тинчуринның үлемсез «Зәңгәр шәл»ен боза алмый, халык аны барыбер яратып кабул итә.

 

Ярый, хуш, җырчыларны карап карыйк инде, алар ничегрәк уйнар икән? Күңелемне мәхәббәт дулкынына көйләп, негатив эмоцияләрне сүндерәм. Әнә, сәхнә түрендә авыл яшьләре Сабан туена әзерләнә. Һәрхәлдә, пьеса буенча шулай булырга тиеш. Яшьләр арасында Мәйсәрә дә бар. Бәй, Ландыш Нигъмәтҗанова бит бу! Абау көяз дә инде! Бу матур яулыгын, канатлы алъяпкычларын чиктереп алды микән, берәрсеннән сорап кына торганмы? Без клубта спекталь куя башласак, авылдагы бөтен сандыкларны актартып, өй борынча кием-салым эзли торган идек. Әллә читекләре дә каюлы инде Мәйсәрәнең?!

Яшьләр сәхнәдә ыгы-зыгы килеп, һәркем үз репертуарыннан берәр куплет җырлап чыкканчы (артистларның җырчы булуын да онытмагыз!), Булат та кайтып җитте. Ба-аа, Ба-ааһ бит бу! Илназ Баһ, әй лә, Булат инде, «братан»нарча гына сәлам биреп сәхнәгә үтте. Бүләген юл уңае «H&M»нан гына алган инде әллә? Скидкалардыр әле, иртәгә кереп чыгасы булыр. Анда зәңгәр шәл сатканнарын гомер белмәс идем монда килмәсәм. Шахтадагы эшләре бик уңган ахрысы замана Булатының: керә-керешли үк залга акча яудыра башлады. Аны инде, моның кадәр байлыгы була торып, бер шәл генә күтәреп кайтмаса да яраган булыр иде. Миһербанлы тагын үзе: и куандырды инде абыстайны, сәдаканы учлап кына сонды. Протез алырга дип, өстәп тә бирде әле, вәйт маладис. Белә карт-карчыкның нечкә җирен! Абыстайны Гөлдания Хәйруллина уйнаганын җырлап җибәргәч кенә абайладым. Рольне кем башкаруын танымасаң, димәк, чын артист бу.

Абау, яшьләрне пыраклатып куган бу гайрәтле егет кем тагын? Ә, Җиһанша икән. Рамил Галимҗанов бу рольгә яшьрәк яшен дә, режиссерлары – Гөлназ Сәфәрова шушы рольдә аны күрергә теләгән икән, япь-яшь җиреңнән картаерсың монда. Шәп уйный тагын үзе, булдыра бит бу!

Гашыйкларның үз хәсрәте хәсрәт булса, авылның кияүгә чыкмый ятучы кызларының үз кайгысы кайгы: кияү табарга кирәк. Шәп кандидатура бар барын: ишанның әле хатыны берәү генә икән. Димәк, боларга үз бәхетләрен сынап караса да була, ислам дине дүрт хатын алырга рөхсәт бирә бит.

Хәтта «Малай на белом барсе» дип, ак мерслы принц көткән Лэйнага кадәр карт ишанга чыгарга риза. Ой, юк, ялгышам, ишаннары алай карт кеше түгел икән әле. Йон оек белән кара галошлары гына картайтып күрсәткән икән ишан Илдар Әхмәтовны. Ну өшкерүен оста өшерә түлке. Әллә соң, концерт араларында андый практикасы да бармы? Алсу Әбелханованың сыеры сөт бирми башлаган әнә, чөнки җен токымыннан булган бозау бозаулаган. Берсенең телефонына да җен оялаган: куйган фотоларына лайкны аз җыя икән. Фотоларыңа лайк куючы булмаса, эш харап шул...

Кемне кемне, ләкин ишанның каравылчысы Галәветдин ролендә ИлCафны күрермен дип уйламаган идем. Баштагы ният белән, ишан ролен ул башкарырга тиеш булган икән. Аннары рольләрне алышканнар.

Монда авыл кызлары гына түгел, ишан үзе дә яшь хатынга өйләнергә каршы түгел. Чибәр Мәйсәрәгә күзе төште моның. «Күкрәкләреңә җеннәр оялаган», – диме? «Өшкерергә кирәк», – диме? Өшкерттереп торыр инде бар.

Аннары ни булганын үзегез беләсез инде: Булат Җиһаншаны үтереп, урманга кача. Хәзер качкыннарның да эше хутлы икән: бер-берсен геопозиция буенча гына эзләп табалар. Смартфоннар тормышыбызның һәр өлкәсенә үтеп керде шул инде, хәтта классик әсәрләргә дә кул сузып маташа әнә.

Бичара Мәйсәрәнең исә үз телефоны да юк икән. Ишан телефоныннан гына ара-тирә ватсапка язгалый ди, мескенем. Телефоны булса, «общий группа»га кертерләр иде инде. Ярый Булатның сеңлесе Заһидә бар әле. Бөрчекле ак күлмәктән, чәчләрен ике толымга үргән бу яшүсмер кызда Ләйсән Гыймаеваны чак танып алдым. Мин түгел, бертуган абыйсы Булат та танымады әле үзен. Соң, ничек танысын, урманга тулы маскировка белән килгән бит! Зәңгәр париклы кыз шул Заһидәдер дип кемнең башына килсен инде

Урманда кыш чыгу перспективасы Булатның үзенә дә кызык түгел бугай. Ни арада группировка җыйган да, ни арада ишан өенә десант төшергән. Җиңде мәхәббәт кара көчләрне, әй лә, ишанны. Куып таратты егетләр аның хәрәмен. Ишанның бер олау сөекле хатыннары  (ул рольләрне Чәчкә, Алсу Әбелханова, Рината Тей, Айгөл Рәхимова, Лэйна башкарды) нишләпләр бетәр инде?

P.S. 14 яшьлек кызыма иң ошаганы Лэйна булды. «Кайчан бетәр», – дип утырган иде, Лэйна теге җырын җырлап күрсәткәч, күңеле булды тагын.

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (0)
Cимвол калды:
Хәзер укыйлар
  • 7816
    1
    68
  • Балан ачылары Әйдәгез, без бу хатынның исемен күрсәтмибез. Шулай исемсез генә булсын ул. Аның ни атлы булуы мөһим дә түгел бит. Ул – шушы көндәлекләрнең хуҗасы.  Теләсәгез, бастырыгыз, гыйбрәт булсын дип, егерме ел элек язылган дәфтәрләрне, миңа биргән иде.
    7758
    1
    53
  • «Насыйбың булыр әле!» Әдибә эштән кайтып керде дә, бермәлгә ишек төбендә тукталып, йорт эченә күз салды. Их, күңелгә рәхәт тә соң нур бөркеп торган өеңә кайтып керүләре! Бар җирдә дә тәртип,
    5713
    2
    53
  • Югалткан мәхәббәт Фәридә Казандагы сәүдә йортында йөргәндә үзенең яшьлек мәхәбәтен очратып, имәнеп китте. «Айрат!» – дигән cүз әйтерсең хатынның теленнән кош кебек чыгып атылды.
    4055
    1
    46
Реклама
Соңгы комментарийлар
  • 12 май 2021 - 11:54
    Без имени
    Дура - бердэнбер туры килгэн суз. Ничек шулкадэр узенне яратмаска була ул,анламыйм
    Сабыр төбе – кара упкын
  • 11 май 2021 - 13:31
    Без имени
    Нигэ мэктэпкэ кереп балаларны.атып ктергэч кенэкуркыныч чаралары курелэ?Кая булган охрана?
    «Әни, аталар, без парта астында....»
  • 11 май 2021 - 14:59
    Без имени
    Аллаһы тзгалә сабырлыклар юирсен. Сабыйларга шифа бирсен Раббыбыз.
    Террорист кулыннан зыян күрүчеләр арасында хәзрәт балалары да бар
  • 11 май 2021 - 23:40
    Без имени
    Аллаһ ярдәменнән , рәхмәтеннән бер мизгелгә дә калдырмасын! Балалар исән - сау терелеп чыксыннар! Бик авыр кайгыгыз белән уртаклашам..Аллаһ Раббым сабырлык, түземлек бирсен. Әмин!
    Террорист кулыннан зыян күрүчеләр арасында хәзрәт балалары да бар
  • 12 май 2021 - 11:24
    Без имени
    Бик кызганыч.Яшь кыз баланың гомере өзелде.Ата- анасы,туганнары өчен бик зур кайгы. Хезмәт юлын күптән түгел генә башлаган укытучы,мәктәпне,балаларны яратып эшләгән бит ул. Авторга әйтәсе сүзем шул- Эльвира чын укытучы,шуның өчен үзенә авыр булса да мәктәбен,укучыларын калдырып китә алмаган.Мәктәп тормышы белән яшәгән,укучылары ,аның өчен,иң кадерле кешеләр булганнар.Ул җаны,тәне,йөрәге белән тырышып эшләгән.Эх,Эльвира кебек укытучылар күбрәк булсын иде.
    Эльвира Игнатьева: «Май аеннан яши башлармын...»
Реклама
«Сөембикә»нең яңа саны һәм... балчык
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда
Бу – безнең уртак тарихыбыз
Журналыбыз архивыннан
«Объективта – әни»