4 сентябрь көнне Татарстан мөселманнары Диния нәзарәте Россия ислам университеты белән берлектә «Якупов укулары» үткәрә. Мондый эчтәлектәге фәнни-гамәли конференция дүртенче мәртәбә оештырыла.
Татарстан Диния нәзарәтеннән алынган мәгълүматларга караганда, чара 2012 елда фаҗигале төстә вафат булган киң танылган дин һәм җәмәгать эшлеклесе Вәлиулла хәзрәт Якупов эшчәнлегенә багышлана. Быелгы укулар «Татар дин әһелләренең рухи мирасы экстремизмга каршы көрәш ысулы» дигән теманы колачлар дип көтелә, дип хәбәр итә чараны оештыручылар.
Вәлиулла хәзрәт рухына багышлап Коръән уку мәҗлесе үткәреләчәк."Якупов укулары»нда Татарстан мөфтие һәм башка төбәк дин әһелләре, күренекле галимнәр, Вәлиулла хәзрәтнең хезмәттәшләре, дуслары катнашыр дип көтелә.
Вәлиулла Якупов йөздән артык китап авторы, «Иман» ислам мәдәнияте үзәгенә нигез салучы. «Иман» нәшриятының мөхәррире, шулай ук 1993 елдан башлап «Мөхәммәдия» мөселман мәдрәсәсенә яңа сулыш өреп җибәрүче. Аның җитәкчелегендә XVIII йөзнең тарихи һәйкәле - Апанай мәчете торгызылды.
Тарих фәннәре кандидаты Вәлиулла хәзрәт Апанай мәчете имам-хатыйбы, Татарстан Республикасының Иҗтимагый палатасы әгъзасы, Татарстан мөселманнары Диния нәзарәтенең мәгариф һәм фән бүлеге мөдире, шулай ук республика Фәннәр академиясенең Ислам тикшеренүләр үзәге фәнни хезмәткәре булып динебез үсешенә зур өлеш кертте.
Фәнни-гамәли конференция Россия ислам институтының актлар залында үтә.
сылтама:
http://intertat.ru/tt/din-tt/item/48325-%E2%80%9Cyakupov-ukularyi%E2%80%9D-uza.html
Комментарий юк