Татарстанда ишегалларын төзекләндерү программасы булдырылачак 

 Республикада «Бердәм Россия» инициативасы белән «Безнең ишегалды» дип аталган яңа республика проекты гамәлгә ашырыла башлаячак. Моңа халыкның әлеге мәсьәлә буенча күпсанлы мөрәҗәгатьләре этәргеч биргән. 

Реклама

Татарстан Президенты Рөстәм Миңнеханов әлеге идеяне хуплап, ишегалларын төзекләндерү буенча программаны формалаштыру өчен халык белән фикерләшүне сораган. Яшәүчеләр балалар мәйданчыгының нинди булырга тиешлеген, өстенлекне парковкаларга яки яшел зоналарга бирүне үзләре хәл итәр дип уйланыла. Бу уңайдан «Бердәм Россия» фракциясе әгъзалары Лилия Маврина белән Роза Җаббарова Казандагы Җиңү проспектында халык белән очрашты. Дәүләт Советы депутатлары халыкка төзекләндерелгән ишегалларының берничә вариантын тәкъдим итте. Яшәүчеләрнең барлык тәкъдимнәрен картада ук теркәп барачаклар. Фикерләшүгә ишегалды хуҗалары – балалар да кушылып, үз теләкләрен җиткерделәр. Күп фатирлы йортларда яшәүчеләр белән һәр районда очрашып чыгачаклар. 

 Татарстанда 5 ел эчендә 1704 ишегалды төзекләндерелде. Белгечләр мәгълүматларына караганда, республикада барлыгы 11 мең ишегалды бар. Яңа программа 5 ел эчендә гамәлгә ашырылып бетәргә тиеш дигән бурыч куелды.