V «Сәләт» белем бирү форумында «Татарстан командасы» иҗтимагый инициативасы “Җиңүчеләр командасы” дигән фотоконкурс башлап җибәрде. Беренче селфи фотосы “Сәләт” форумы мәйданчыкларында ясалды: Татарстан Президенты Рөстәм Миңнеханов Республика студентлар хезмәт отрядлары үзәге җитәкчесе Ринат Садыйков белән бергә фотога төште.
“Татарстан командасы”ның яңа бәйгесе – республикага булган мәхәббәтеңне белгертүнең тагын бер ысулы. Хәер, фотолар төрле жанрда булырга мөмкин. Пейзажмы ул, гаилә портретымы, репортаж фотоларымы – бәйгегә барысы да кабул ителә. Аның нәтиҗәсендә Татарстанның портреты булдырылачак.
– Татарстан – безнең илебезнең һәрвакыт динамикалы үсештә булган төбәге. Бөтен уңышлар – җитештерү сәнәгатендә булсынмы ул, авыл хуҗалыгындамы, сәламәтлек саклау өлкәсендәме, яшьләр сәясәтендәме – аларның барысының нигезендә безнең күпмилләтле халкыбыз һәм аның лидеры – Рөстәм Миңнехановның бөтмәс-төкәнмәс хезмәте ята. Шуңа күрә аның белән бергә төшкән фотоны мин, һичшиксез, конкурска тәкъдим итәм, – ди Ринат Садыйков.
Әлеге бәйгедә теләгән һәркем катнаша ала. Моның өчен 15 августка кадәр fototatarstan.ru сайтына фото җибәреп, аны #командататарстана #татарстанкомандасы дигән хэштеглар белән социаль челтәрләрдә урнаштырырга кирәк. Иң яхшы фотолар күчмә күргәзмәдә урын алачак, авторларын истәлекле бүләкләр көтә.
Яңа проектны республиканың “Яшь гвардия” оешмасы әгъзалары тәкъдим иткән. “Яшь гвардия” оешмасының Татарстандагы бүлеге җитәкчесе Динар Бариев әлеге конкурска “Сәләт” форумында катнашучыларны да чакырып калды. “Әгәр дә сез үз тормышыгызны фотографияләрдән башка күз алдына китермисез икән, димәк, әлеге бәйге сезнең өчен”, – ди Динар.
Исегезгә төшерәбез: “Татарстан командасы” иҗтимагый инициативасы моннан өч атна элек оешты. Бүген әлеге командада йөздән артык кеше бар. Аларның барысын да республикага булган ватанпәрвәрлек хисе берләштерә. Иҗтимагый инициатива дәвамында спорт ярышлары, төрле бәйгеләр һәм акцияләр уза. Аларда һәр татарстанлы катнашып, үз тәкъдимнәрен җиткерә ала.
http://intertat.ru/tt
Комментарий юк