Шәфәгать САЛИХОВ һәлак булган

Танылган баянчы, Татарстанның атказанган мәдәният хезмәткәре Шәфәгать САЛИХОВ һәлак булган... Бу хакта социаль челтәрләрдә аның дуслары яза. Берничә сәгать кенә элек ул Казан–Чаллы трассасында юл һәлакәтенә очраган. Күпләребез аны һаман да Салаватның баянчысы буларак хәтерли идек.

«Сөембикә» журналы укучысына да Шәфәгать Салихов исеме шактый таныш һәм бик якын иде. Әле ул яңа гына «Без һәм алар» рубрикасында безнең сорауларга җавап бирде. Шактый ихлас җаваплар иде алар... Инде менә барысы да артта, үткәндә калды: төзеп бетермәгән йорты, гастрольләре, чыгышлары... Язмыштан узмышлар юк... Безгә биргән интервьюсында, хатыны Лариса турында: «Минем өчен ул – укылмаган китап...» – дигән иде. Шәфәгать дигән китапны да без инде башка укый алмаячакбыз – аның бүген соңгы бите ябылды... Урыны җәннәттә булсын...

Якыннарының күтәрә алмаслык авыр кайгысын уртаклашабыз. Ходайдан аларга сабырлык сорыйбыз...

Шәфәгать САЛИХОВ: «МИНЕМ ӨЧЕН УЛ – УКЫЛМАГАН КИТАП...»

Следите за самым важным и интересным в Telegram-каналеТатмедиа