Логотип
Яңалыклар

​Әнкарадә «Җырлы-биюле Татарстан» концерты була

Бүген Төркия башкаласы Әнкараның иң зур тамашалар залында Татарстан сәнгать әһелләренең зур концерты булачак. «Җырлы-биюле Татарстан» дип аталган тамаша Татарстан Республикасы Президенты вазифаларын вакытлыча башкаручы Рөстәм Миңнехановның Төркиягә рәсми сәфәре кысаларында оештырыла. Концерт программасы эчтәлеген Татарстан дәүләт симфоник оркестры, «Казан» бию ансамбле, Татарстан дәүләт фольклор ансамбле кебек халкыбызның йөзек кашы булган коллективларның, танылган җырчылар Ригина Вәлиева, Гөлнора Рәхимова, Филүс Каһиров, Эльмира Кәримуллина, Марсель Вәгыйзов, Рузил Гатин, Айгөл Хәйри кебек аерым башкаручыларның чыгышларыннан гыйбарәт. Күренекле музыкант, аккордеонда уйнау остасы Алмаз Әхмәтҗанов, Россиянең «1нче канал»ындагы «Голос. Дети» телепроектында зур уңышка ирешкән 14 яшьлек Сәидә Мөхәммәтҗанова, төрки халыкларның «Türkvizyon – 2014» җыр бәйгесендә икенче урын алган Айдар Сөләйманов та - төрек халкына татар сәнгатен танытучылар арасында.

Җыеп кына әйткәндә, 140 сәнгать әһеле сәхнә алачак «Җырлы-биюле Татарстан» концертын,  Төркия дәүләт һәм Әнкара шәһәре хакимияте җитәкчеләре белән бергә, барлыгы 3 мең кеше тамаша кылар дип көтелә. Чараны күрергә Эскишәһир, Кютахия, Измир кебек калаларда яшәүче милләттәшләребезнең дә җыелышып киләчәкләре билгеле.

Концерт программасы кысаларында фотосурәт һәм кул эшләре сәнгате күргәзмәсе тәкъдим ителәчәк.

Сылтама: http://tat.tatar-inform.ru/news/2015/04/29/108929/

Следите за самым важным и интересным в Telegram-каналеТатмедиа

Комментарий юк

Хәзер укыйлар