«Хәзинә» милли сәнгать галереясендә татарлар турында борынгы фоторәсемнәр күргәзмәсе эшли

Татарлар башка илләрдәге мөселман халкы белән чагыштырганда иртәрәк фоторәсемгә төшә башлаган. Аларның беренче фоторәсемнәре XIX гасырның алтмышынчы елларыннан ук билгеле. «Хәзинә» милли сәнгать галереясендә ачылган «Россия татарлары. XIX гасыр ахыры - XX гасыр башы» күргәзмәсендә шәхси тупланмаларда сакланган 400ләп тарихи фоторәсем бар. Болар – танылган коллекционер Низами Ибраимовның зур фоторәсемнәр тупланмасында сакланган эшләр.

Экспозициядә Санкт-Петербург, Мәскәү, Казан, Чистай, Әстерхан, Түбән Новгород, Касыйм, Уфа һәм башка шәһәрләрдәге фотоательеларда татарлар төшкән фоторәсемнәр урын алган. Әлбәттә, татарның бай катламнары фоторәсемгә төшә алган.

Фотография барлыкка килү хатын-кызның “иреккә чыгуына” тәэсир итүче бер адым дип бәяли күргәзмәне оештыручылар. Экспозициядә хатын-кызларның үзләре генә дә, гаилә белән төшкән фоторәсемнәре дә бар. Татар ханымнары һәм туташлары барысында да Европа модасы буенча, әмма милли элементлар кулланып киенгән.

Экспозициягә фоторәсемнәр белән беррәттән Татарстан Республикасы Дәүләт Сынлы сәнгать музее коллекциясеннән татар декоратив-гамәл сәнгать әйберләре – хатын-кыз баш киемнәре, ювелир эшләнмәләр дә танышырга мөмкин. Шулай ук Татарстан Республикасы Фәннәр Академиясенең Тарих институты, Энциклопедия институты материаллары, сәнгать фәннәре докторы Гүзәл Сөләйманова-Вәлиева, тарих фәннәре докторы Лилия Габдрафикова Россия татарларына кагылышлы эзләнү материаллары урын алган.

“Уйланырлык урын бар – замандашларыбыз гаилә архивындагы борынгы фоторәсемнәрне чыгарып аталар, саталар; ярый әле, киткән буыннар символы булган кадерле ядкәрләрне бөртекләп җыйган коллекционерларыбыз бар”, - ди оештыручылар.

Күргәзмә 7 июньгә кадәр эшли.

http://tatar-inform.tatar