Казанда "Милләтләр кроссы-2016" узды

Казанда "Милләтләр кроссы-2016" Бөтенроссия йөгерү ярышлары узды. Быел бу ярыш шәһәрнең Үзәк стадионы янындагы мәйданчыкта үткәрелде.
Быел да "Милләтләр кроссы" кысаларында 1 км га массакүләм, VIP-йөгерүләр, шулай ук 2, 4, 6, 8, 12 км буенча ярышлар узган. 1 км га массакүләм стартларда 20 меңнән артык кеше катнашкан дип фаразлана.
 
Бүген VIP-ярышларда хакимиятнең дәүләт һәм муниципаль органнар вәкилләре дә катнашкан. Татарстан Премьер-министры урынбасарлары Васил Шәйхразиев һәм Шамил Гафаров, Татарстан экология һәм табигый ресурслар министры Фәрит Абдулганиев, Татарстан сәламәтлек саклау министры Гадел Вафин, Татарстан хезмәт, халыкны эш белән тәэмин итү һәм социаль яклау министры Эльмира Зарипова һәм Татарстан Министрлар Кабинетының башка вәкилләре, шулай ук республика Дәүләт Советы депутатлары, дәүләт һәм муниципаль ведомстволар түрәләре 1 км ны йөгереп узган. Хатын-кызлар арасында өченче урынны Татарстан хезмәт, халыкны эш белән тәэмин итү һәм социаль яклау министры Эльмира Зарипова алган, икенче - Татарстан Министрлар Кабинетының Сәламәтлек саклау, спорт һәм сәламәт яшәү рәвеше формалаштыру мәсьәләләре идарәсе башлыгы Гүзәл Шакирова, беренче - "Татарстан Мәҗбүри медицина иминиятләштерүе территориаль фонды" ДУ директоры Алсу Мифтахова. Ир-атлар арасында бронза медальне Татарстан Президенты карамагындагы Эшмәкәрләр хокукларын яклау буенча вәкаләтле Тимур Нагуманов алган, көмешне - Татарстан Премьер-министрының тышкы икътисади эшчәнлек буенча ярдәмчесе Наил Насыйбуллин, алтынны - Татарстан Министрлар Кабинеты Аппараты җитәкчесе урынбасары - эшләр белән идарә итүче Сергей Коростелев. Җиңүчеләргә медальләр һәм грамоталар тапшырылган, дип хәбәр итә "Татар-информ" мәгълүмат агентлыгы.

чыганак: http://intertat.ru/tt