31 июль көнне сәгать 15.00 дән 22.00 гә кадәр Казанда Г. Камал исемендәге Татар дәүләт академия театры каршындагы мәйданда «Исэн!fest» тере татар музыкасы фестивале була. Анда Татарстан, Башкортстан, Удмуртия Республикаларының иң яхшы артистлары чыгыш ясаячак.
Татар эстрадасына параллель рәвештә, татар сәнгатендә альтернатив музыка да үсеш кичерә. Татар музыкантлары көнбатыш музыкасы белән милли моңнарны берләштерергә омтыла. Үз иҗатларын алар беренче тапкыр уздырылачак фестивальдә тәкъдим итә алачак.
«Исән!fest» белән бергә «Печән базары» татар һөнәрчеләре ярминкәсе һәм «Уку паркы» лекторие эшләячәк. Аларда осталарның эшләре белән танышырга, мастер-классларда катнашырга, мода күрсәтүне күзәтергә, укуларда катнашырга мөмкинлек тудырыла. Шул рәвешле, Иске Татар бистәсе заманча татар мәдәниятенең үзәгенә әвереләчәк.
Программада «Ittifaq», «Alqanat» төркемнәре, Валерий Коротков һәм Радик Сәлимов җитәкчелегендәге «Alma» этно проекты, Альберт Исмаил, Рәдиф Кашапов, Оскар чыгыш ясаячак.
Моннан тыш, Ижевскидан килгән «Silent Woo Goore» төркеме удмурт халык җырларын башкарачак. Уфаның «Аргамак» төркеме дә тамашачы хозурына иҗатын тәкъдим итәргә ниятли, диелә «Татмедиа» Республика матбугат һәм массакүләм коммуникацияләр агентлыгы хәбәрендә.
сылтама:
http://tat.tatar-inform.ru/news/2015/07/29/111787/
Комментарий юк