Кама Тамагы районында Сабан туен билгеләп үттеләр

Бәйрәм районның иҗат коллективларының традицион чыгышыннан башланды, аннан соң сәхнәгә район башкарма комитеты җитәкчесе Павел Лоханов чыкты. Ул Сабан туена җыелган халык игътибарына ТР Президенты вазифаларын вакытлыча башкаручы Рөстәм Миңнехановның тәбрикнамәсен укыды. «Язгы кыр эшләре тәмамлануны гәүдәләндергән бәйрәм безне туган нигезгә һәм милли традицияләргә кайтара, буыннарның өзлексез рухи бәйләнешен тәэмин итә», - дип Павел Лоханов Татарстан лидеры котлавыннан юллар китерде.

Павел Лоханов Сабан туеның традицион төстә җәйнең башы булуын билгеләп узды. «Бүген кан һәм тир белән шушы бәйрәмне билгеләп узу мөмкинлеген биргән, үзен кызганмыйча тәүлек буе язгы кыр эшләрендә уздырган затларны хөрмәтлибез», - дип мөрәҗәгать итте районда яшәүчеләргә башкарма комитет җитәкчесе.

Ул бәйрәмгә килгән халыкка котлау сүзләрен җиткерде. Аннан соң авыл хуҗалыгы алдынгыларын бүләкләү булды.

«Президент белән бергә» хәрәкәте активистлары «Спортивный Татарстан» мәйданын оештырган, анда теләге булган һәркем үз көчен ГТО нормаларын бирүдә сынап карый алды. Мондый ук мәйданчыклар, Сабан туен бәйрәм иткәндә, Татарстанның барлык районнарында оештырыла. ГТО нормаларын бәйрәмгә килгән күп кеше тапшырырга карар кылды. Аны уңышлы тапшырганнар «Президент белән бергә» значогын һәм диплом алды. ГТО нормаларын, шулай ук, Павел Лоханов та бирде. «Рөстәм Нургалиевич – безнең лидер, гомеренең күп өлешен эштә уздыручы бик актив кеше, әмма, шул ук вакытта, беркайчан да спорт турында онытмый, - дип белдерде Лоханов, ни өчен ГТО нормаларын бирергә уйлавы турындагы сорауга җавап биреп. – Аның командасында спорт белән мавыгучан булмау – начар күренеш».

Чара кысаларында башка спорт ярышлары да – көрәш, канат тарту һәм сумо оештырылган. Бәйрәмдә 4 меңгә якын кеше катнашкан.


сылтама: http://tat.tatar-inform.ru/news/2015/06/06/110183/