​II бөтендөнья төрки журналистлары җыены ачылды.

Җыенда төрки дөнья журналистлары, Татарстан Республикасы массакүләм мәгълүмат чараларының баш мөхәррирләре катнаша. Әлеге чарага 22 илдән – Әзербайҗан, Төрекмәнстан, Казакъстан, Үзбәкстан, Кыргызстан кебек БДБ илләреннән, Төркия, Сирия, Болгария, Румыния, Венгрия, Греция, Германия, АКШ, Англия, Франция һәм башка илләрдән  якынча йөзләп журналист килгән.

Конференция алдыннан кунаклар газета-журналлардан торган күргәзмә белән танышты. 

Татарстанны Россия Федерациясе чикләреннән читтә дә танытуны, төрки дөнья илләрендә матбугатның роленә багышланган чаралар үткәрүне һәм төрки дөньяның бердәм медиакыры һәм матбугаты темалары буенча семинарлар узыруны, әлеге корылтайда катнашучылар белән Татарстан журналистлары арасында тәҗрибә уртаклашуны максат иткән корылтайда бу юлы төрки дөньяда коммуникацион үсеш һәм хезмәттәшлек, төрки дөньяда Татарстанның геосәяси структурасы һ.б. мәсьәләләр буенча чыгышлар ясалды, фикер алышынды.

P. S. Төрки дөнья журналистлары корылтаеның беренчесе «2013 елда Эскишәһир - төрки дөньяның мәдәни башкаласы» программасы кысаларында былтыр Төркиянең Эскишәһир каласында узган иде.