Казанны тикмәгә генә Россиянең спорт башкаласы дип йөртмиләр шул инде. Бу җәйдә ул тагын бер популяр спорт проектын уздыру урыны булачак. 10 июньдә сәгать 11дә «Зөя калкулыклары»нда («Свияжские холмы») «Геройлар узышы. Яңа биеклек» проектына старт биреләчәк. Катнашучылар, 10 километрга сузылган трассада 20 каршылыкны узып, финишка киләчәкләр. Бу проект Казанда беренче тапкыр уздырыла. Гомумән, ул илнең тау чаңгылы, ял парклы курортларында, Мәскәүдән Владивостоккача тау түбәләре, яшел үзәннәре булган иң матур урыннарда үткәрелә. Экстрим, комфорт, боулинг, бильярд, ату, пляж – вакытны күңелле үткәрү өчен менә дигән!..
Инде 1000 нән артык кеше «Геройлар узышы»нда катнашырга теләк белдергән. Илкүләм проектның быел нәкъ менә Зөя буенда узуы Казанның спорт башкаласы булуын тагын бер тапкыр раслый. Үз транспортлары булмаучылар аптырап калмасын: Ярминкә мәйданыннан иртәнге 7 дә автобуслар алып китәчәк. Оештыру взносы 200 сум тәшкил итә. Бушлай ашау, бүләккә жетоннар, палаткалар шәһәрчегендә киенү-чишенү, душ, саклык камералары... Сәламәт яшәү рәвешенә, дөрес туклану темаларына лекторийлар, мастер-класслар... Инструкторлар, «Ашыгыч ярдәм» машиналары... Кыскасы, барлык шартлар да тудырылган. Чарада катнашучылар ярты сәгать аралыгында, 150 – 200 кешелек төркемгә берләшеп, стартка баса. Шунысы кызык, катнашырга теләүчеләр арасында кызлар бик күп икән! Алар катнашырга теләк белдерүчеләрнең 40-45% ын тәшкил итә. Хәер, алар табигатьләре белән үк активрак, чыдамрак, тәвәккәлрәк халык шул!
«Геройлар узышы» исеменең дә үз тарихы бар. Үзеңне җиңеп, диваннан тора, офистан чыгып китә аласың, шушы спорт бәйрәменә килеп кушыла алырлык ихтыяр көче табасың икән, димәк, син – герой! Каршылыкларны уза-уза ярышта катнашмасаң да, борчыласы юк – тамаша кылып торучыларга да бик күңелле булачак! Ә балалар рәхәтләнеп ял итәчәк!
Следите за самым важным и интересным в Telegram-каналеТатмедиа
Комментарий юк