Эдвард Радзинский хатын-кызлар патшалыгын «ача»

Киләсе елга 80 яшь тулса да, ул үз юбилеен үткәрү турында уйлап та карамый. Шәһәрләр, корабльләрнең юбилейлары гына үткәрелергә тиеш, дип саный Эдвард Радзинский.

Танылган тарихчы «Хатын-кызлар патшалыгы» дигән яңа программасын тәкъдим итә. 19 ноябрьдә Казанда Татарстан Мәдәният министрлыгы ярдәме белән мәгърифәтче, язучы, драматург, алып баручы Эдвард Радзинский кичә уздырачак.

Хәер, әлеге шәхеснең исемен белмәгән кеше юктыр, ул махсус тәкъдим итүгә дә мохтаҗ түгел. Эдвард Радзинский китапларын АКШ, Англия, Франция, Германия, Италия, Швеция, Япония, Финляндия, Голландия нәшриятләре бастырып чыгарган. Җитмәсә, шушы драматург пьесаларын күп кенә режиссерлар сәхнәләштергән.

«Хатын-кызлар патшалыгы» программасында Радзинский 18 гасырда ил белән идарә иткән биш шәхес турында бәян итәчәк.

- 18 гасырны нәзакәтле (галантный) вакыт, дип йөртәләр. Ул чордагы 5 император-хатын-кыз чикләнмәгән хакимияткә ия булган. Нәкъ менә 18 гасыр мәхәббәтнең сәясәт белән идарә иткән соңгы чоры булуын дәлилли. Монда мәхәббәтне яшермәгәннәр, бу патшабикәләр үз сөяркәләре белән хәтта горурланган. Елизавета, Анна Иоанновна, Анна Леопольдовна, Екатерина Великая – барысының да мәхәббәт тарихлары ялкынлы. Тик араларында иң серлесе Екатерина I булган, – дип ассызыклый Эдвард Радзинский.

Тарихчы берәр темага алынса, аңа аның турында бар нәрсәне дә белергә кирәк. Ләкин ул тарих белән бәйле мәгълүматне тарихи чыганаклардан гына алмый. Аңа һәр нәрсәне тоеп, үз күзе белән күрергә кирәк икән. Аның фикеренчә, хәзерге Россия – сәяси яктан ир-атлар иле. “Тагын бер Екатерина II туганын көтик”, – дип елмая ул.

Тарихчының “Хатын-кызлар патшалыгы” программасы «Яшерен Россия» циклына кертелгән. Әйтергә кирәк, кичәдә күп кеше ишетмәгән фактлар, илебез тарихындагы фаҗигале закончалыклар турында фикер алышу да булачак.

Радзинский мондый чараларга ничек әзерләнүе турында да бәян итте. Ул аларга махсус әзерләнми икән. Чөнки чыгыш лекция кебек булырга тиеш түгел. Шуңа күрә һәрбер кичә бер-берсеннән аерылып тора. Тарихчының үзенә дә Казандагы чарада нәрсә сөйләячәге кызык.