​«Ауропа гүзәле» таҗын кайсы татар кызы кияр?

Венера ВӘГЫЙЗОВА (ГЕРАСИМОВА) – Бөтендөнья татар конгрессының VI съездына Алманиядән, Берлин шәһәреннән килде. («Сөембикә» журналын даими укып баручылар бәлки исләренә дә төшерерләр: калфагын кыңгыр салып, ул безнең журнал тышлыгында да чыккан иде). Язмышы шундый – аның да гомере мөһаҗирлектә уза. Ире белән бергә озак еллар татарлар өчен электрон журнал чыгардылар. Аның вафатыннан соң, кызын ялгызы үстерә.

Венера ханымның Ауропа татарларын берләштерүдә өлеше бик зур.

Чын татар – ул үз халкын яратучыдыр. Чит илләрдә дә андый татарлар шактый. Тик телне белмисез дип безне гаепләргә ашыкмагыз. Татарча сөйләшмәүче милләттәшләребез Казанда да җитәрлек, – диде ул. – Безгә өстән генә карамагыз. Без дә дә сезнең кебек үк моңлы җырларыбызга, бәйрәмнәребезгә, татарча тапшыруларга мохтаҗ. Кайда гына яшәсәк тә, Татарстан безнең дә уртак Ватаныбыз.

Европада бүген йөз меңгә якын татар яши. «Ауропа татарлары» альянсы Европа илләрендәге 27 татар оешмасын берләштерә. Инде шактый чаралар үткәрергә өлгердек: ике Корылтай, берничә конференция... Тагын бер яңалыгыбыз бар: киләсе елда без «Ауропа гүзәле» бәйгесе уздырырга телибез. Татар кызлары туган телебезне, тарихыбызны, динебезне белүдә көч сынашачак.