Атна ахырына суыта

Бүген, 14 июль көнне Казанда көндез эсселек 38 градуска җитте. Ләкин алга таба эсселек чигенә. Татарстан Гидрометеорология үзәге җитәкчесе Феликс Гоголь әйтүенчә, бу атна ахырына таба – пәнҗешәмбе һәм җомгада һава температурасы бераз төшә, республиканың көнбатыш районнарында ул 23-24 градуска гына калачак.  Пәнҗешәмбе көнне салкын һава агымы әле бөтен республика буйлап узып өлгерми, шуңа да көнчыгышта эсселек саклана. Урыны-урыны белән яшенле яңгырлар, хәтта боз яву да көтелә. Шимбә-якшәмбе көнне тагын да салкынчарак булачак. 
«Июль аеның икенче яртысы өчен Россия Гидрометеорология үзәге һава температурасы нормадан  4 градуска артыграк булачак дип фаразлаган иде. Якынча шулай булачак та, бәлки әле тагын да артып китәр», – дип белдергән Феликс Гоголь.